ندر پہ شھید پدائی ماھل بلوچ ءِ نام ءَ
شائر :کامریڈ کازی
دی بلوچستان پوسٹ
دان جھان ھست اِنت تو زندگ ئے
تو ماھل ئے تو شیرزالین بانک ئے
تو بانڑی ءِ راھانی پد گر ئے
تو گل بی بی ءِ زھم ءُ اسپر ئے
تو شارُل ءِ وابانی مانا ئے
تو سمو ءِ ساپ این دل ئے
تو بلوچستان ءِ ھر میتگ ءُ شھر ئے
تو گوادر ، پنجگور ءُ نوشکے ئے
تو گریشگ ، نال ءُ مشکے ئے
تو سرمچارانی مرادین منزل ئے
تو اسلم ءِ پرزند ئے
تو کریمہ ءِ دلبند ئے
تو بیگوائین بچانی مات ءِ دل ئے
تو کوہ ءُ کوچگ ءُ نیلین زر ئے
تو برزین کوہانی ٹل گٹ ءُ گر ئے
تو شاشان ءُ بولان ءِ چمگ ئے
تو زمین ءِ اشک ءُ مھبت ئے
تو آسمی پُل ئے
تو گلاب ءِ وشبو ئے
تو دمبرتگین برتانی توکل ئے
تو بیگہ ءِ سردین گوت ئے
تو سھب ءِ سمین ئے
تو زاکر ءُ زاھد ءِ بندیگین دل ئے
تو دین جان ءِ سمل ئے
تو بلوچ ءِ آجوئی ءِ سنگر ئے
تو پہ بداں بشی جمبر ئے