بلوچستان ءِ دمگ ھزدار ءَ میر یوسف علی خان قلندرانی ءِ یل نہ کنگ ءِ ھلاپ ءَ جمیعت علماء اسلام ءَ زھرشانی نندانک بندات کتگ کہ ایشی ءِ سبب ءَ شال ءُ کراچی ءِ نیام ءَ زمینی رای کٹ کنگ بوتگ۔
جے یو آئی ءِ رد ءَ زھرشانی کنوکاں ھزدار ءِ دمگ سنی ءِ آر سی ڈی ءِ مستریں راہ پہ ٹریپک ءَ بند کتگ ءُ زھرشانی دھرنا داں یوسف قلندرانی ءِ یل دیگ ءَ برجاہ بیت۔
دھرنا ءِ سروکی ءَ جے یو آئی ءِ سروک مولانا قمر الدین کنگ ءَ اِنت وھدے کہ قلندرانی قبیلہ ءِ سردار علی محمد قلندرانی ، ضلع ءُ قبیلہ ءِ نمائندگ ءُ مزنیں کساسے ءَ باسکاں ھم بھر زرتگ ۔
زھرشانی کنوکاں گْوشتگ داں مئے سنگت سلامتی یل نہ بیت ما زھرشانی ءَ ھلاس نہ کن ایں ۔
آر سی ڈی روڈ ءِ بند بوھگ ءِ سبب ءَ شال ءُ کراچی ءِ نیام ءَ روگ ءُ آیگ بند بوتگ ایشی ءِ سبب ءَ مساپر ءُ بار ی گاڑیانی دراجیں لین لگ اتگ انت۔
زانگ بہ بیت کہ میر یوسف علی خان قلندرانی 17اگست 2025ءَ چہ کراچی ءَ دزگیر کنگ بوتگ چہ ھما وھد ءَ آ بیگواہ انت۔
میر یوسف قلندرانی ھزدار شهرستان توتک ءِ جھمنند انت اے اولی وئیل نہ انت کہ اے کھول ءِ مردم پاکستانی لشکر ءِ نشانگ جوڑ کنگ بوتگ انت۔ 18 فروری 2011 ءَ پاکستانی لشکر ءَ توتک ءِ میتگ چہ ھمک نیمگ ءَ انگیر ءَ کرتگ ءُ ھمک لوگ پٹ ءُ پول کتگ۔ اے بیڑ بازیں کلاکاں برجاہ بوتگ ، میتگ ءِ درستیں مردین یک جاہ ءَ جم کنگ بوتگ انت، لشکر ءَ گپتگ ءُ ناشناسیں جاہے ءَ برتگ انت۔ پد ءَ آیانی تہ ءَ بازیں مردم یل بیتگ انت بلے 82 سالی ئیں محمد رحیم خان قلندرانی ءُ آئی ءِ کھول ءِ دگہ 16 مردم یل کنگ نہ بوتگ اَنت ۔