ناکہ بندی ءِ وھد ءَ سلاہ بندیں مردماں لیویز ءِ کارندہ دزگیر کتگ انت۔
ھالانی رد ءَ بلوچستان ءِ دمگ کیچ ءِ شھر تربت کلاتک ءَ مین ھائی وے ءِ سر ءَ سلاہ بندیں مردماں سنگر گپتگ ءُ اود ءَ گوزوکیں گاڑیانی چیک ءُ تان کتگ ءُ لیویز ءِ کارندہ دزگیر کتگ انت۔
ھمے وھد ءَ سلاہ بندیں مردماں لیویز ءِ کارندہ بازیں وھدے ءَ الگار کتگ ءُ آیانی سلاہ پچگپتگ اَنت بلے پد ءَ آ یلہ کنگ بوتگ اَنت۔
دمگی مردمانی گشگ ءِ رد ءَ سلاہ بندیں مردماں مزنیں وھدے ءَ مزنیں راہ ءِ سر ءَ گاڑیانی پٹ ءُ پول برجاہ داشتگ۔
زانگ بہ بیت کہ بلوچ آجوئی ءِ گل باز وھد ءَ بلوچستان ءِ راہ ءُ دراں بند کنگ ءَ اَنت ءُ گاڑیانی پٹ ءُ پول ءَ کنگ ءَ اَنت، وھدیکہ اے وھد ءَ سلاہ بندیں مردم پاکستانی لشکر، سرکاری واکدار ءُ مڈی باریں گاڑیانی نشانگ کنگ ءَ اَنت۔
اے وئیلانی زمہ واری جتا جتائیں آجوئی ءِ گلاں زرتگ انت بلے انگت ءَ ھچ گل ءَ کلاتک ءِ وئیل ءِ بابت ءَ وتی لیکہ ءِ دیم ءَ نیاؤرتگ انت-