بلوچ لبریشن آرمی ءِ جارکش جیئند بلوچ ءَ رسانکدراں وتی شنگ کرتگیں درشان ءِ تہ ءَ گوشتگ کہ تمپ ءَ زورگریں پوج ءِ گوم ءَ میڑ ءَ بی ایل اے ءِ سرمچار سنگت زاھد سالھ پنام ءِ واھد نمیران بوتگ ۔
بی ایل اے ءِ جارکش ءَ سرجمیں ھال داتگ ءُ گوشتگ کہ 22 اگست ءَ تمپ ءِ دمگ تلوکان ءَ بلوچ لبریشن آرمی ءِ سرمچار گل ءِ کارانی درگت ءَ سپر ءَ بوتگ انت کہ گوں زورگریں پوج ءَ دپ کپتگ انت گڈا ھمے میان ءَ میڑ بندات بوتگ ۔ اے میڑ ءَ زورگریں پوج ءِ بازیں کارمندے مرتگ ءُ زدگ بوتگ انت وھدیکہ سرمچار زاھد سالھ پنام ءِ واھد دلیری ءَ گوں جنگ کنان نمیران بوتگ
آئیءَ گوشتگ کہ نمیرانیں سنگت زاھد پنام ءِ کپٹن واھد ء سالھ مھمد کیچ ءِ دمگ تمپ نزرآباد ءِ جھمنند بوتگ ۔ وتی جنگی کارشونیانی سوب ءَ وتی سنگتانی تہءَ شرپ رستگیں سنگت زاھد ءَ سال 2014 ءَ بلوچ راجی آجوئی ءِ جھد ءِ ھاتر ءَ سلاہ بندیں زرمبشت ءِ بھر جوڈ بوتگ ۔
جارکش ءَ گوشتگ کہ نمیرانیں زاھد پنام ءِ واھد ءَ سال 2023 ءَ بی ایل اے ءَ بھر زرتگ ءُ تمپ ، زامران ءُ دشت ءِ کوھاں وتی کرد پیلو کتگ ، آ یک جھدی ایں سنگت ءِ بوتگ کہ آئی ءَ وتی زند ءِ ھر یک ساھت ءِ سرڈگارءِ نام ءَ ندر کتگ ۔
جارکش جیئند بلوچ ءَ گوشتگ کہ نمیرانیں سنگت زاھد بلوچ ءِ دیھمونی اے گپ ءِ شاھدی ءَ دنت کہ زورگریں تاکت ءِ بگیری ءَ اے جھد بس یک مردمے ءَ گوں بندوک نہ انت بلکنہ اے راجی کول ئے ۔ نمیرانیں سرانی مشن ءُ واب زندگ انت ءُ سرمچار وتی جانانی دیمھونی ءَ دیگ ءَ انت ءُ اے جھد ءَ گیش مھکم کنگ ءَ انت ۔ بلوچ راج وتی نمیرانیں سرانی ھوناں مپت ءَ روگ ءَ نئیل انت ءُ آئی ءِ راہ ءِ سرا رؤکیں آجوئی ءِ منزل ءَ تاں دیما روان کنت۔