پاکستانی فیلڈ مارشل ءِ دمگ ءِ تر ءُ تاب ءِ وھد ءَ سلاہ بندیں مردماں یک کمیونیکیشن ٹاورے تباہ کتگ ءُ پوج ءِ واستا راشن ءَ لوڑیں گاڑی ھم نشانگ جوڑ کنگ بوتگ۔
ھالانی رد ءَ بلوچستان ءِ دمگ کیچ ءَ پاکستانی لشکر ءِ راشن ءَ لوڑیں گاڑی ناشناسیں سلاھبندانی دو جتا جتائیں اُرشانی تہ ءَ نشانگ جوڑ کتگ ءُ یک کمیونیکیشن کمپنی یوفون ءِ یک ٹاورے ھم تباہ کنگ بوتگ۔
ھالانی رد ءَ کیچ ءِ دمگ بلیدہ ءَ ناشناسیں سلاہ بندیں مردماں فورسز ءِ راشن ءَ لوڑیں گاڑی ءِ سر ءَ اُرش کتگ کہ ایشی ءِ آسر ءَ گاڑی سرجم ءَ تباہ بوتگ ءُ آئی ءِ تہ ءَ ھواریں راشن ھم سُتکگ ءُ پُر بوتگ اَنت۔
اُرش کنوک اُرش ءَ پد چہ ھما جاہ ءَ درکپگ ءَ سوبین بوتگ اَنت، دومی نیمگ ءَ دشت سلائی ءِ ایم 8 شھدگ ءِ نزیک ءَ یوفون نیٹ ورک ٹاور ھم نشانگ جوڑ کنگ بوتگ۔
دمگی مردمانی رد ءَ ناکہ بندی ءَ پد سئے موٹر سائیکل سواریں نزیک ءِ شش سلاہ بندیں مردماں ٹاور ءِ چیر ءَ تراکناکیں شورو ایر کتگ کہ ایشی ءَ چہ ٹاور نہ ایوک ءَ تباہ بوتگ بلکیں ایشی ءِ تہ ءَ ایریں مشینریاں ھم سک باز تاوان بوتگ۔
تاں انوگ ءَ اے اُرشانی زمہ واری ھچ وڑیں گل ءَ نہ زرتگ، البت اے دمگ ءَ بلوچ آجوئی ءِ سلاھبندیں گلانی وئیل ءُ آیانی نیمگ ءَ پاکستانی لشکر ءِ سر ءَ اُرش ھم بیتگ اَنت۔
زانگ بہ بیت مرچی پاکسرانی فوج ءِ سروک جنرل عاصم منیر تربت ءِ تر ءُ تاب ءَ انت، ایشی ءِ سبب ءَ دمگ ءَ سیکورٹی سک باز ترند کنگ بیتگ ءُ بالیگانی بال ھم برجاہ انت۔
دومی نیمگ ءَ بلوچستان ءِ دمگ چاگی ءِ ھند دالبندین ءَ سلاہ بندیں مردماں مڈی ءِ بروکیں دو گاڑی ءِ اوشتگ ءَ پد سوتکگ انت کہ ایشی ءِ تہ ءَ گاڑی تباہ بوتگ اَنت۔