روکپتی بلوچستان ءِ شھر ایرانشھر ءِ ھند دامن ءَ سلاہ بندیں مردماں فورس ءِ دو گاڑیانی سر ءَ اُرش کتگ ءُ کم چہ کم 5 کارندہ بیران بوتگ اَنت۔
اے اُرش آدینگ ءِ روچ ءَ بوتگ کہ ایشی ءِ تہ ءَ کم چہ کم 5 ایرانی کارندہ بیران بوتگ اَنت۔ جیش العدل ءَ اے سلاہ بندیں اُرش ءِ زمہ واری من اتگ۔
جیش العدل ءَ وتی بیان ءَ ٹاہ داتگ کہ آئی ءِ جنگولاں پولیس فراجا ءِ گشت ءِ یک یونٹے نشانگ جوڑ کتگ، ءُ بیران بوتگیں کارندھانی سلاہ ھم گوں وت برتگ اَنت۔
چمدیستگیں مردمانی رد ءَ اے اُرش دامن ءِ مزن شھدگ ءِ سر ءَ ھما وھد ءَ بوتگ کہ فورسز ءِ گاڑی چہ اود ءَ گوزگ ءَ بوتگ اَنت۔
اُرش ءَ پد ایرانشهر ءُ دامن ءِ کش ءُ گور ءَ سیکورٹی ترند کنگ بیتگ۔