سر وزیر بلوچستان سرفراز بگٹی ءَ پریس کانفرنسے ءِ تہ ءَ اسسٹنٹ پروفیسر قاضی عثمان ءَ شال ءَ ریل ءِ اسٹیشن ءِ وت کُشی اُرش ءُ اے دگہ اُرشانی آسراتی ءِ بھتام جتگ ءُ آئی ءِ دزگیر کنگ ءِ پدرائی کتگ۔
سر وزیر بلوچستان ءَ دزگیریں پروفیسر قاضی عثمان ءِ ریکارڈ بیان ھم شنگ کتگ کہ آئی ءِ تہ ءَ آئی ءَ گْوشتگ کہ ماسٹرز چہ قائداعظم یونیورسٹی ءَ کتگ ءُ پشاور یونیورسٹی ءَ پی ایچ ڈی کتگ ءُ 18 گریڈ ءَ لیکچرر ءِ بستار ءَ پوسٹ ءَ بوتگ انت۔
بلوچستان ءِ سر وزیر سرفراز بگٹی ءَ گشتگ سیکورٹی ادارگاں وت کُشیں تراک کارے دزگیر کتگ۔
زانگ بہ بیت کہ 12اگست ءِ سھب ءَ شال ءِ دمگ افنان ٹاؤن ءَ پاکستانی لشکر ءُ سی ٹی ڈی ءِ کارندھانی دست ءَ پروفیسر عثمان قاضی گوں وتی کسانیں برات جبران احمد ءَ یک نندوکیں لوگے ءِ سر ءَ چھاپہ ءِ وھد ءَ دزگیر کنگ بوتگ۔
چار روچ ءِ زورانسری بیگواہ کنگ ءَ پد پروفیسر عثمان قاضی شال ریل اسٹیشن ءِ وت کُشیں اُرش ءَ ھوار دگہ اُرشانی تہ ءَ ھوار بوھگ ءِ بھتام ءَ دزگیر کنگ بیتگ۔
زانگ بہ بیت کہ ایشی ءَ چہ پیسر ھم پاکستانی لشکر ءُ سی ٹی ڈی ءَ جتا جتائیں کیس ءُ بھتامانی تہ ءَ جتا جتائیں دمگاں چہ زورنسری بیگواھیں مردم دیم ءَ آؤرتگ ءُ دزگیر کتگ اَنت بلے بازیں مردم آمیدگس ءِ نیمگ ءَ بے گناہ سابت کنگ ءَ پد یل کنگ بیتگ اَنت۔