بلوچ آجوئی لوٹوکیں مردماں آپریشن ءِ مول ءُ مراد ءَ دمگ ءَ اتکگیں پورسز ءِ کاروان ءِ سر ءَ بازیں جاہ ءَ اُرش کتگ۔
بلوچستان ءِ دمگ ھزدار ءِ ھند چہ زھری ءَ رس اتگیں ھالانی رد ءَ دمگ ءَ فوج ءِ برزی بال گردانی بال برجاہ انت ءُ گوستگیں روچ ءَ زھری ءِ دمگ گونیکو ءُ آڑیچینو ءَ ھم جنگ ءُ چوپ ءِ ھال سر بیتگ انت۔
چہ ایشی ءَ پیسر زھری، گزان، مشک ءُ سوئندہ ءِ نزیک ءَ سئے جاھاں اُرش کنگ بوتگ کہ ایشی ءِ تہ ءَ لشکر ءِ بازیں کارندہ بیران بوتگ اَنت، وھدیکہ یک کاروائی ءَ سرکار ءِ پلامرزی ءَ ھستیں دو مردم ھم بیران بوتگ اَنت۔
دی بلوچستان پوسٹ ءَ دمگی مردماں گْوشتگ کہ 11 اگست ءَ پاکستانی لشکر ءِ کاروان چہ میدانی دمگاں زھری ءِ تہ ءَ پترگ ءِ جھد ءَ بیتگ کہ چہ کوھاں ایر کپتگیں بازیں کچے ءَ سلاہ بندیں مردماں لشکر انگیر کتگ ءُ اُرش کتگ انت۔
دمگی مردمانی رد ءَ گوستگیں روچ ءَ ھم اڑیچینو ءِ جاہ ءَ درجناں سلاہ بندیں مردماں پورسز ءِ سر ءَ اُرش کتگ۔
چمدیستگیں مردمانی رد ءَلشکر ءِ کاروان کہ آئی ءِ سر ءَ اُرش کنگ بوتگ آ دومی روچ ءَ تاں میدانی دمگ ءَ درتک نہ بیتگ۔
زانگ بہ بیت 11 اگست ءَ بلوچ آجوئی لوٹوکیں مردم زھری ءِ شھر ءَ پُترتگ اَنت ءُ مھلوک ءَ گوں تران کنان ءَ پد پاکستانی لشکر ءِ زمینی ءُ برزی کمک دمگ ءَ سر بیتگ ءُ دراج کشیں جنگ ءُ چوپ برجاہ بیتگ-
بلوچ آجوئی لوٹوکیں مردمانی اُرشانی تہ ءَ پاکستانی لشکر ءَ تاوان رس اتگ، بلے تاں انوگ ءَ اے درگت ءَ پاکستانی واکدارانی نیمگ ءَ ھچ وڑیں بیان دیم ءَ نہ یتکگ انت۔