بسیمہ ءَ کرفیو جنگ بیتگ، شھری چہ لوگاں درنیاھگ ءِ کڈنی

بلوچستان ءِ دمگ بسیمہ ءَ دمگی انتزامیہ ءَ گوستگیں سیکیورٹی ءِ ناگیگیں جاورانی سر ءَ شھری اَچ لوگاں درنیاھگ ءِ کڈنی کتگ انت ءُ گرین چوک ءَ داں درگ ءَ شپ ءِ ساھت دَہ ءَ داں سھب ءِ پنچ ءَ ھمک ڈولیں سر ءُ پرانی سر ءَ بندش جنگ بیتگ انت-

انتزامیہ ءِ نیمگ ءَ چہ شنگ بوتگیں پرمان ءِ تہ ءَ گْوشگ بیتگ کہ اے وھد ءِ تہ ءَ ابید پیش ءَ ھال دیگ ءَ اجازت ءَ چہ رھادگ بوھوکیں مردم وتی جان ءُ مال ءِ تاوان ءِ زمہ وار وت بنت۔

انتزامیہ ءَ شھریاں ھشدار داتگ کہ آ کانون ءِ ساز کنوکیں ادارھانی گوما سرجمی ءَ ھمکاری بہ کن انت اگاں ناں ھلاپ ورزی کنوکاں گوں ترندی ءَ کانون ءِ درچ ءَ سزا دیگ بنت-

شھریاں کڈن کنگ بوتگ کہ آ ھچ وڑیں مچانکی یا پیشگی اجازت ءِ ھاتر ءَ پولیس کنٹرول روم ءَ گوں رھوت بہ کن انت۔

زانگ بہ بیت کہ گوستگیں روچاں بلوچ آجوئی ءِ سلاہ بندیں گلاں یک ھمگرنچیں اُرشے ءِ تہ ءَ بسیمہ ءَ پاکستانی لشکر ءِ بنجاھی کارگس نشانگ جوڑ کتگ کہ ایشی ءِ تہ ءَ کیپٹن آصف ءَ ھوار 13 کارندہ بیران ءُ کم چہ کم 11 ٹپیگ بوتگ اَنت۔

اے وئیل ءَ پد دمگ ءَ مزنیں لشکرہ کارندہ دیم دیگ بوتگ انت، بازار بند اَنت ءُ شھری وتی لوگاں بند اَنت۔

دومی نیمگ ءَ اے ماہ ءَ واکداراں بلوچستان ءِ جتاجتائیں دمگاں انٹرنیٹ ءُ ٹرانسپورٹ بند کنگ ءِ ھواری ءَ لس مھلوک ءِ روگ ءُ آیگ ءِ سر ءَ ھم بندش جتگ۔

ھمے رنگ ءَ بلوچستان ءِ تیابدپی شھر گوادر ءُ کیچ ءِ دمگ ناسع آباد ءَ ھم شھری بندشانی آماچ اَنت کہ اود ءَ پورسز ءَ دکانداراں چہ دکان پچ کنگ ءَ نھاد داری مکن کتگ ءُ لوگ ءَ نندگ ءِ کڈن کتگ انت۔

دومی نیمگ ءَ سرجمیں بلوچستان ءَ یک ماھے ءَ چہ دفعہ 144 ایر کنگ بوتگ کہ ایشی ءِ چیر دستی ءَ ڈبل سواری ءِ سر ءَ ھم پابندی جنگ بیتگ اَنت۔