بلوچستان ہائی کورٹ ءِ ھاسیں پرماناں ابید ھم انگت ءَ موبائل انٹرنیٹ سروس بند اَنت کہ ایشی ءِ سبب ءَ جتا جتائیں تکاں بندوکیں مردم تکانسر انت-
گیشیں ھالانی رد ءَ بلوچستان ھائی کورٹ ءَ گوستگیں روچ ءَ بلوچستان ءِ درستیں دمگاں انٹرنیٹ ءِ پچ کنگ ءِ پرمان داتگ ات بید چہ ھما دمگاں کہ سیکورٹی ءِ جیڑھ ھست انت بلے آمید گس ءِ پرمان ءَ ابید ھم ھچ دمگ ءَ موبائل انٹرنیٹ سروس پچ کنگ نہ بوتگ انت۔
شال، تربت، پنجگور، خضدار ءَ ھوار جتاجتائیں دمگانی تہ ءَ انٹرنیٹ ءِ بندش ءِ سبب ءَ کمیونیکیشن سسٹم، وانگی چست ءُ ایر، آن لائن بزنس ءُ میڈیا رپورٹنگ سک باز سانمند انت۔
بلوچستان ءَ موبائل انٹرنیٹ ءِ بندش دو ھپتگ سرجم بوھگ ءَ انت۔ پی ٹی اے ءُ بلوچستان سرکار ءِ گشگ انت کہ اے گامگیج سیکورٹی ءِ جیڑھانی رد ءَ داں 31 اگست ءَ کاربند بیت۔
اگست ءِ مراگش ءَ پد بلوچستان ہائی کورٹ ءَ ھاسیں پرمان داتگ ات کہ ایوک ءَ ترسیں دمگاں انٹرنیٹ ءِ بندش جنگ بہ بیت، وھدے کہ دگہ دمگانی تہ ءَ اے سروس زوت پچ کنگ بہ بیت۔ بلے آمید گس ءِ پرمان ءَ پد ھم انٹرنیٹ سروس بند اَنت۔
آن لائن وانگ ءِ نودربراں انٹرنیٹ بند کنگ ءُ سرکاری بے رھبندی ءِ سر ءَ سکیں جیڑہ درشان کتگ اَنت۔ آھاں گشتگ کہ آ نہ کلاس ءَ ھوار بوھگ ءِ وس ءَ دار اَنت ءُ نہ کہ اسائنمنٹ دیم دیگ ءِ وس ءَ اَنت۔ یونیورسٹی ءِ بازیں نودربراں گشگ ءِ رد ءَ وانگ ءِ سال ءَ را سانمندی ءِ آماچ کنگ بوتگ۔
آن لائن بزنس ءُ فری لانسنگ ءَ گوں بندوکیں ہزاراں مردم مالی درچ ءَ ھم سک باز زیان بوتگ انت۔
بلوچستان ءِ رسانکدر ءِ ادارگ ءُ اھوالکاراں ھم برجاھیں انٹرنیٹ بند کنگ ءِ سر ءَ دلپدردی درشان کُتگ۔ آہانی گشگ انت کہ بلوچستان ءَ چہ ھالانی راجی ءُ میان استمانی تک ءَ دیم دیگ کساس نا ممکن بوتگ کہ ایشی ءَ چہ رسانکدر ءِ آجوئی ءَ سک باز تاوان دیگ بوگ ءَ انت۔
مھلوک ءَ لوٹ کتگ کہ گکومت ءَ چہ آمید گس ءِ پیسلہ ءِ اھترام ءَ زوت موبائل انٹرنیٹ سروس ءِ پچ کنگ بہ بیت دانکہ استان ءَ ھمک روچی زند وشھال بہ بیت-