بلوچستان سرکار ءَ سرجمیں بلوچستان ءَ دفعہ 144 ءَ دگہ 15 روچ ءِ واستا گیش کتگ کہ ایشی ءِ رد ءَ تاں 31اگست ءَ لس مچی ءُ لس کارانی سر ءَ بندش برجاہ بنت۔
سرکاری جار ءِ رد ءَ اے وھد ءَ موٹرسائیکل ءِ ڈبل سواری بندش ءُ موٹرسائیکل ءِ سواری ءِ وھد ءَ نکاب جنگ ءَ اجازت نہ بیت انت- پنچ ءَ گیش مردم یکجاہ بوت نہ کنت-
زانگ بہ بیت کہ بلوچستان ءَ پیسر ءَ دفعہ 144 پانزدہ اگست بیتگ-
13 اگست ءَ سرکار ءَ سرجمیں بلوچستان ءَ شپ ءِ وھد ءَ پبلک ٹرانسپورٹ ءِ روگ ءُ آیگ ءِ سر ءَ ھم بندش جتگ ۔ بس ءُ دگہ پبلک ٹرانسپورٹاں شپ ءِ 5 ءَ بگر داں سھب ءِ 5 ءَ شھدگانی سر ءَ روگ ءِ اجازت نہ دیگ بیتگ ءُ پادمال کنوکیں کمپنیانی روٹ پرمٹ پچگرگ بیت انت-
زانگ بہ بیت سرکار ءِ نیمگ ءَ بلوچستان ءِ سرجمیں 36 دمگاں چہ شش اگست ءَ موبائل انٹرنیٹ (تھری جی ءُ فور جی) سروسز مھتل کنگ بوتگ اَنت ءُ اگدہ دارانی رد ءَ اے بندش داں 31اگست ءَ مان اِنت۔
واکدارانی ءِ رد ءَ اے گامگیج اگست ءِ ماہ ءِ ھاسیتی ءِ سبب ءَ زورگ بوتگ کہ اے روچانی تہ ءَ بلوچ سلاہ بندیں گلانی اُرش گیش بنت۔ ’’اُرشانی ھترہ ھاسیں رنگ ءَ 11، 14 اگست ءُ 26 اگست ءَ گیش بیت، گوستگیں سال ءَ اے روچانی تہ ءَ بازیں اُرش بوتگ انت-