شال ءَ وتی چک ءِ واستا انساپ ءِ لوٹ ءَ زھرشانی نندانک دیوکیں زالبول گوں وتی کسان سالیں جنک ءَ پولیس ءَ دزگیر کتگ۔
شال ءَ پوج ءِ تیرگواری ءَ بیران بیتگیں ورنا احسان شاہ ءِ مات عارفہ شاہ کہ بنداتی ءَ پولیس ءَ بیگواہ کتگ، پد ءَ واتر یل دیگ بیتگ ءُ آئی ءَ اے گپ پدر کتگ کہ آ شال پولیس ءَ دزگیر کتگ ءُ آئی ءِ بندیگ کنگ ءِ وھد ءَ بیھار داتگ۔
عارفہ شاہ ھمے سال ءِ جون ءَ مستونگ گنجپ ڈوری ءِ ھند ءَ پاکستانی پوج ءِ کارندھانی دست ءَ کشگ بیتگیں وتی زھگ ءِ انساپ ءِ لوٹگ ءَ گوستگیں دو ھپتگاں شال پریس کلب ءِ دیم ءَ نندانک ءَ نشتگ بیتگ-
گوستگیں روچ ءَ آ چہ زھرشانی ءِ جاہ ءَ گوں وتی کسانیں جنک ءَ پولیس ءَ دزگیر کتگ۔ آئی ءِ نزیکیں سیاداں آئی ءِ بیگواہ بوگ پدر کتگ بلے نوں عارفہ شاہ ءَ وت اے گپ ءِ پدرائی کتگ کہ آئی ءَ را پولیس ءَ دزگیر کتگ ءُ آئی ءِ بندیگ کنگ ءِ وھد ءَ آئی ءَ را ذھنی ترس، بیھارانی دیمپانی کنگ کپتگ-
عارفہ شاہ ءَ وتی یل بوگ ءَ پد ویڈیو بیان ءِ تہ ءَ گْوشتگ کہ من ھمے ھاتر ءَ دزگیر کنگ بیتگ انت کہ من وتی چُک ءِ کُشوکاں سزا دیگ لوٹ آں ۔ بندیگ جاہ ءَ من ءَ باز رند ءَ گْوشگ بوتگ کہ زھرشانی ءَ ھلاس بہ کن، بے توار بہ بئے ءُ گوں رسانکدر ءَ گپ مہ کن۔
آئی ءَ اے ھم گْوشتگ کہ گوستگیں بازیں روچاں شال پولیس ءِ سپرنٹنڈنٹ ءَ زھرشانی ءِ ھلاس نہ کنگ ءِ سر ءَ آئی ءَ را دزگیر کنگ ءُ بیگواہ کنگ ءِ بیھار داتگ انت۔
بلوچ یکجھتی کمیٹی ءَ اے وئیل ءِ تُرندی ءَ ایر جتگ ءُ گْوشتگ کہ پرامنیں زھرشانیانی دیم ءَ دارگ ءِ واستا ریاستی تاکت ءِ کارمرد کنگ نہ منّگ بیت۔ گل ءِ گشگ انت کہ عارفہ شاہ انساپ ءِ بدل ءَ زلم ءِ آماچ بوتگ۔
گل ءَ چہ دمگی ءُ میان استمانی انسانی ھکانی گل، اھوالکار، وکیل ءُ سول سوسائٹی ءَ لوٹ کتگ کہ آ عارفہ شاہ ءَ گوں انساپ بہ کن اَنت ءُ آئی ءِ گون ءَ اے دابیں رویشانی ھلاسی ءِ لوٹ ءَ بہ کن انت-