انگیریں بلوچستان
ٹی بی پی شونگال
بلوچستان ءِ سر ءَ مُشتگیں اڑتگیں سرکار ءِ پیسلاھاں مھلوک یک پچیں بندیگی ءَ مٹ کتگ انت – انٹرنیٹ ءُ موبائل نیٹورک ءِ وڑیں بنیادی آسراتی چہ پیش ءَ بند انت، نی سپری پابندی، بینک ءُ بازاراں زورانسری بندشی ءَ زندگی ناگیگ کتگ – لس مھلوک نان ءِ چُنڈ، الاج ءُ روزگار ءِ وڑیں بنیادی ھکاں تلوسگ ءَ انت، بلے مزن تاکتداریں سیاسی چھرگ زمینی راستیانی منگ ءَ ابید میڈیا ءِ وتگڑیں درشاناں وشی ءَ شاتمان انت-
اڑتگیں سر وزیر جشنِ آجوئی ءِ مراگشاں امن ءُ دیمروئی ءِ ٹاھانی دیگ ءَ انت،.بلے راستی ایش انت کہ سیکیورٹی ءِ ترس ءَ مزنیں شھدگ بند انت- کوسٹل ھائی وے، شال – کراچی روٹ ءُ پنجاب ءَ گوں ھوار کنوکیں زمینی ءُ ریل ءِ راہ بے مدتیں وھدے ءَ کٹ کنگ بیتگ انت- انگیر ءَ بلوچستان تَھ ایے ڈیھ ءَ گوں سِستگ-
چہ انٹرنیٹ ءِ بندش ءَ گھگیری جنگ ءِ دارگ یکدم بے سوب بیتگ- گوستگیں ھپتگں رخشان ڈویژن ءِ ھند واشک ءِ بسیمہ ءَ پوجی بنجل ءِ سر ءَ اُرش ءَ یک کیپٹنے ءَ ھوار نُھ کارندہ کشگ بیتگ انت ءُ اے دابیں اُرش جتا جتائیں جاھاں برجاہ انت-
مھلوک گژن، بے روزگار ءُ انگیر ءَ کتگ جشنِ آجوئی ءِ بیرک ءَ برز کت کن ات، بلے ناں آجوئی ءِ زرمبشت ھلاس بیت ءُ ناکہ زرکاری ءِ ماھول اتک کنت- اے پالیسی بس لس مردمانی ٹپاں گیشتر جُھل کنت – گوستانک ءِ ھمے ردیاں دوبر کنگ ءُ مزن واکدار وتی وھدی درشان ءَ کساس کت کن انت، بلے زمینی راستیانی مٹ بوگ ءِ واک آیانی دست ءَ نہ انت-