ماما قدیر بلوچ ءِ جاور نگیگ اَنت، گوں نگیگیں جاوراں وارڈ ءَ برگ بیتگ

بلوچستان ءَ زورانسری آوار جنی ءِ ھلاپ ءَ دراجکشییں بُنجل ءِ سروکی کنوکیں ماما قدیر بلوچ ءِ جاور نگیگ اَنت-

وائس فار بلوچ مسنگ پرسنز ءِ وائس چیئرمین ماما قدیر بلوچ گوستگیں لھتے ماہ ءَ چہ وش نہ اِنت آ نادُراھجاہ ءَ الاج کنگ ءَ اِنت- گل ءِ نیمگ ءَ چہ شنگ کتگیں درشان ءِ تہ ءَ گوشگ بیتگ کہ مروچی آئی ءِ تبیت گیش ھراب بیتگ آ نادُراھجاہ ءَ گوں نگیگیں جاوراں وارڈ ءَ برگ بیتگ-

ماما قدیر بلوچ کہ گوستگیں شانزدہ سالاں چہ شال ءُ کراچی ءَ زورانسری آوار جنی ءِ ھلاپ ءَ زھرشانی بُنجل ءِ سروکی کتگ ، 2013 ءَ آ شال ءَ چہ کراچی ءُ پد کراچی ءَ چہ اسلام آباد ءَ تاں یک دراجیں پندی ءَ لانگ مارچ ءِ سروکی ھم کتگ، کہ بلوچستان ءَ زورانسری آوار جنی ءُ ٹپ ءُ ٹوریں لاشانی ھلاپ ءَ زھرشانی بیتگ-

ماما قدیر جتاجتائیں میان استمانی کانفرنساں ھم بلوچستان ءَ برجاہ انسانی ھکانی ھلاپ ورزیانی سر ءَ توار چست کتگ، کہ اود ءَ آئی ءَ جھان ءَ را جاورانی سرپدی داتگ-

آئی ءِ سروکی ءَ بندات بیوکیں شُدکشیں ھڑتالی زھرشانی بُنجل مروچی ھم شال پریس کلب ءِ دیم برجاہ ءَ اِنت-

وائس فار بلوچ مسنگ پرسنز ءَ بلوچ راج ءَ چہ ماما قدیر بلوچ ءِ زوت وش بیگ دوا ءِ دزبندی کتگ ءُ اے کول کتگ آ آئی ءِ مشن ءَ برجاہ دار اِیت، زرمشبت ءَ گیش مھکم کنت ءُ دیم ءَ بارت-