کراچی پریس کلب ءِ ڈن ءَ نودربر زاھد علی ءِ یل کنائینگ ءِ ھاتر ءَ زھرشانی بُنجل برجاہ

کراچی یونیورسٹی ءِ میان استمانی پڑ ءَ سیادی ءِ بیست پنچ سالی ئیں بلوچ نودربر زاھد علی ءِ پاکستانی پوج ءِ دست ءَ زورانسری آوار جنی ءَ سی روچ سرجم بیتگ، بلے تنی وھدے کھول ءَ ھچ وڑیں سرپدی دیگ نہ بیتگ-

زاھد علی بلوچ ھپدہ جولائی 2025 ءَ پاکستانی پوج ءَ آئی ءِ رکشے ءَ ھوار دزگیر کتگ ءُ ناشناسیں جاھے ءَ برتگ-

وئیل ءِ ھلاپ ءَ زاھد علی ءِ مات ءُ پت ءُ کھول نیمگ ءَ چہ گوستگیں دو ھپتگ ءَ چہ کراچی پریس کلب ءِ دیم ءَ زھرشانی نندانک ءَ نشتگ اَنت اود ءَ کراچی سول سوسائٹی، انسانی ھکانی کارکنان ندا کرمانی ءُ دگہ بُنجل ءَ اتکگ ءَ ھمدردی درشان ءِ کتگ-

کھول ءَ گوشتگ کہ زاھد ءِ پت عبدالحمید، کہ ھیپاٹائٹس ءِ نادُراھے، سک نادُراھی ءَ چہ اَبید کراچی پریس کلب ءِ ڈن ءَ جتگیں زھرشانی بُنجل ءَ ساڑی اِنت آئی ءِ پت ءَ گوشتگ کہ دانکہ چُک ءِ واتری نہ بیت، آ بُنجل ءَ یل نہ کنت-

بلوچ یکجھتی کمیٹی ءَ کھول چہ ھمدردی درشان کنان ءَ گوشتگ کہ زاھد ءِ کیس کراچی ءُ بلوچستان ءَ بلوچ ورنایاں نشانگ کنوکیں زورانسری آوار جنی ءِ یک مھکمیں پالیسی ءِ بھر اِنت کہ آئی ءِ ھلاپ ءَ انسانی ھکانی گل یکشل ءَ توار چست کنگ ءَ اَنت-

گل ءَ گوشتگ کہ ما نودربر، اِھوالکار، انسانی ھکانی کارکنان ءُ سرجمیں زانتکاریں شھریاں چہ دزبندی کن ایں کہ آ زاھد ءِ کھول ءَ گوں ھمدردی ءِ کنگ ھاتر ءَ بُنجل ءَ ھوار بہ بنت ءُ آئی ءِ پہ سلامتی واتری ءِ لوٹ ءَ بکن اَنت-