چہ شال ءُ کیچ ءَ زالبولے ءَ ھوار نُھ مردم زورانسری بیگواہ

چہ شال ءُ کیچ ءَ کاؤنٹر ٹیررازم ڈپارنمنٹ ( سی ٹی ڈی) ءُ پاکستانی پلامرزی سلاہ بندیں ٹولی ” ڈیتھ اسکواڈ ” ءَ کم چہ کم نُھ مردم بیگواہ کتگ اَنت کہ آیانی تہ ءَ یک زالبولے ھم ھوار اِنت-

سریاب ءِ دمگ لوھڑ کاریز ءَ سی ٹی ڈی ءِ کارندھاں لوگانی سر ءَ بیڑبرتگ بازیں مردمے آوار جتگ ءُ ناشناسیں جاھے ءَ برتگ اَنت-

اِھوالکار ءِ گوشگ اِنت کہ بیگواہ کنگ بیتگیانی تہ ءَ لوھڑ کاریز پبلک لائبریری ءِ سروک بسم اللہ بلوچ ھم ھوار اِنت- اے لائبریری گوستگیں بازیں سالاں چہ دمگ ءِ ورنایانی واستا وانگ ءُ زانگ ءِ بُنجاہ زانگ بیت-

آوار جنگ بیتگیں مردمانی تہ ءَ نمرہ کرد لوگ بانُک جمیل کرد ھم ھوار اِنت- آیانی کھول ءِ گوشگ اِنت کہ آ چہ لوگ ءَ دزگیر کنگ بیتگ ءُ ناشناسیں جاھے ءَ برتگ اَنت چریشی ءَ پد آیانی ھچ وڑیں ھال نیست-

آ دگہ بیگواھیں مردمانی تہ ءَ یعقوب بنگلزئی ء ملا محمود بنگلزئی، بسم اللہ شاھوانی ء منیر شاھوانی کہ لائبریری ءِ سروک ھم بیتگ، ماما دین محمد ء خان محمد کہ اُمر ھپتاد پنچ سال اِنت ءُ آئی ءِ مستریں برات خان محمد ھوار اِنت- کھول ءِ رِد ءَ خان محمد سرکاری کاردارے-

دگہ بیگواہ بیتگیں مردمانی تہ ءَ یوسف کرد ء حیدر کرد، اویس کرد ء حلیم ءُ شکور ء حلیم کرد ھوار اَنت-

اِھوالکار ءِ رِد ءَ شش ءَ چہ ھپت مردم دگہ ھم آوار جتگ ءُ بیگواہ کتگ اَنت آیانی پجّار انگت نہ بوتگ-

دومی نیمگ ءَ کیچ ءِ دمگ ھوشاپ ءَ چہ ارز مھمد بازار ءَ زورانسری بیگواہ کنگ بیتگیں آواز بلوچ ءِ پت حسن ء جان محمد ھکومتی پلامرزی سلاہ بندیں ٹولی ڈیتھ اسکواڈ ءِ کارندھاں زورانسری بیگواہ کتگ-

بلوچستان ءَ زورانسری آوار جنی ءِ جیڑہ بازیں سالاں چہ انسانی ھکانی گل ءِ تُرس ءِ سبب اَنت- سانمندیں کھولانی گوشگ اِنت کہ اے دزگیری درکانودی ءُ بید آمیدگس ءِ پرمان ءَ کنگ بیگ ءَ اِنت-