بلوچانی بیگواھی ءُ سیاسی بندیگی: کراچی ءُ اسلام آباد ءَ زھرشانی نندانک برجاہ

کراچی ءُ اسلام آباد ءَ بلوچ سیاسی رھشونانی دزگیری ءُ زورانسری بیگواھیانی ھلاپ ءَ زھرشانی نندانک برجاہ انت-

بلوچستان ءَ بلوچ یکجھتی کمیٹی ءِ رھشونانی دزگیری، انساپ ءِ نہ بیگ ءُ چہ کراچی ءُ بلوچستان ءَ زورانسری بیگواھیانی واستا کراچی ءُ اسلام آباد ءَ پریس کلبانی دیم ءَ زھرشانی نندانک دیان ءَ وتی دوستیں مردمانی یل دیگ ءُ انساپ ءِ لوٹ ءَ کنگ ءَ انت-

کراچی پریس کلب ءِ دپ ءَ بیگواھیں نودربر زاھد علی بلوچ ءِ یل کنگ ءِ واستا بنجل ءَ یک ھپتگے بیت کہ یک زھرشانی برجاہ اِنت۔ لیاری ءِ دمگ کلری ءِ 25 سالی زاھد ءِ ھاندان ءُ سیاد ءُ وارس ھمک روچ کلب ءِ دپ ءَ زھرشانی ءَ بھر زورگ ءَ اَنت۔

زاھد ءِ پت عبدالحمید بلوچ ءَ رسانکدر ءَ گوں تران کنان ءَ گْوشتگ کہ منی چک ءَ شپ ءُ روچ پہ لوگ ءِ ھرچ ءُ درچ ءِ پیلو کنگ ءَ کار کتگ ءُ مات ءُ پت ءِ الاج ءِ ھم زمہ واری آئی ءِ سر ءَ اِنت۔

آئی ءَ گوشت کہ اے سکیں گرم ءِ تہ ءَ مارا امیت انت کہ بوت کنت ریاستی ادارگ مئے جاورانی سر ءَ رھم بہ کن انت ءُ مئے چک ءَ سلامتی ءَ یل بہ دے انت۔

آئی ءَ گیش گوشت کہ ھمک شھری ءَ را آزاتیں زند گوازینگ ءِ ھک ھست بلے ریاست ءَ اے ھک مارا چہ پچ گپتگ۔ آئی ءَ چہ انسانی ھکانی گل، مزن آمیدگس، رسانکدر ءُ سرجمیں انسان دوستیں تبکاں گوں دزبندی کتگ کہ آ زاھد علی بلوچ ءِ یل کنگ ءِ واستا وتی کرد ءَ پیلو بہ کن اَنت۔

زانگ بہ بیت کہ زاھد علی بلوچ 17 جولائی 2025 ءَ سیکورٹی ادارھانی نیمگ ءَ دزگیر کنگ ءَ پد بیگواہ کنگ بوتگ کہ ایشی ءَ پد آئی ءِ لوگ ءِ مردماں زھرشانی بندات کتگ۔

دومی نیمگ ءَ اسلام آباد پریس کلب ءِ دیم ءَ بلوچ یکجھتی کمیٹی ءِ رھشون ءُ بیگواھیں مردمانی کھولانی نندانک بیست ءُ ھپتمی روچ ءَ سر بیتگ۔

زھرشانی کنوکیں مردمانی گْوشگ اِنت کہ اے روچ پہ بلوچ مات ءُ گْوھار ءُ ورنایاں یک دراجیں ءُ گرانیں جنزے ءِ چیدگ اِنت کہ ایشی ءِ تہ ءَ آیاں ریاستی بے پروائی چہ نزیک ءَ دیستگ۔ آیانی لیکہ انت کہ ریاست راستی ءَ پُشت ءَ کت نہ کنت ءُ بلوچ راج وتی ھکانی واستا آواز چست کنت داں کہ راستی منّگ بہ بیت-