بلوچستان ءَ ڈیوٹی ءَ فیڈرل کانسٹیبلری ( ایف سی) ءِ دو کارندہ گوستگیں دو روچاں خیبرپختوانوا ءِ ھند لکی مروت ءَ ناشناسیں مردمانی اُرشاں مرتگ انت-
پولیس ءِ رد ءَ لکی مروت ءَ ناشناسیں سلاہ بندیں مردمانی تیرگواری ءَ چہ بلوچستان ءَ ڈیوٹی داریں ایف سی ءِ کلرک بیران بوتگ۔ کشتگیں کارندہ موکلانی وھد ءَ وتی ھند ءَ شتگ بیتگ-
اے وئیل ھما وھد ءَ بوتگ کہ آ گوں وتی جن ءَ موٹر سائیکل ءِ سر ءَ سوار بوتگ۔ ایف سی ءِ کارندہ اُرش ءِ جاہ ءَ بیران بوتگ وھدے کہ آئی ءِ جنین سک ٹپی بوتگ کہ آئی ءَ نادراھجاہ ءَ سر کنگ ءِ وھد ءَ وتی ٹپانی درد نہ سگ اتگ ءُ مرتگ۔
ھمے رنگیں وئیلے دو روچ ءَ پیش اتکگ کہ بلوچستان ءَ ڈیوٹی داریں ایف سی ءِ دگہ کارندھے عطا اللہ لکی مروت ءِ شھر ءَ ناشناسیں سلاہ بندیں مردمانی تیرگواری ءَ بیران بوتگ۔
پولیس ءِ رد ءَ عطا اللہ موکلانی وھد ءَ وتی ھند ءَ شتگ بیتگ- انگت ءَ ھچ گل ءَ اے وئیلانی ذمہ واری نہ زرتگ۔