بلوچستان ءِ سرکار ءَ اُستان ءَ سلاہ بندیں گلانی رھوتانی دارگ 31 اگست ءَ داں انٹرنیٹ سروس مھتل کنگ ءِ پیسلہ کتگ، اے درشانداب بلوچستان ءِ سرکار ءِ جارکش شاھد رند ءَ میان اُستمانی ھالرسان ‘ رائٹرز ’ ءَ داتگیں یک درشانے ءَ گوشتگ-
جارکش ءِ رد ءَ بلوچستان ءَ پرکاریں سلاہ بندیں گل انٹرنیٹ ءِ وس ءَ یکے دومی ءَ گوں رھوت ءَ بوتگ انت ، ایشی ءِ رد ءَ سیکورٹی ادارگانی سفارش ءِ سر ءَ سروس ءِ مھتل کنگ ءِ پیسلہ کنگ بوتگ ۔
زانگ بہ بیت گوستگیں سئے روچاں سرجمیں بلوچستان ءَ موبائل انٹرنیٹ سروس بند کنگ بیتگ۔ بندات ءَ سرکار ءِ نیمگ ءَ ھچ وڑیں درشان نہ بوتگ بلے گوستگیں روچ ءَ پاکستان ٹیلی کمیونیکیشن اتھارٹی ”پی ٹی اے“ ءَ نوٹیفکیشن شنگ کتگ کہ ایشی ءِ تہ ءَ 31اگست ءَ تاں سروس ءِ بند کنگ ءِ ھال راست کنگ بوتگ ءُ اے گامگیج ءَ را سیکورٹی ءِ جیڑھاں گوں ھمگرنچ کتگ۔
اے ماہ ءِ بندات ءَ بنجاھی ھکومت ءَ چہ شال ءَ ایران ءُ عراق ءَ روڈ ءِ سر ءَ روگ ءِ سر ءَ ھم سیکورٹی بنیاد ءَ بندش جتگ ات ءُ استان ءَ پرپٹانی سواری ءِ سر ءَ ھمم بندش تاں 15 اگست ءَ ایر کنگ بوتگ۔
بلوچستان ءَ گوستگیں سئے روچاں چہ سرکار ءِ اے پیسلہ ءَ پد سرجم ءَ انٹرنیٹ بلیک آؤٹ اِنت ءُ اے گامگیجانی سوب ءَ دمگی مردم سکیں دلپدردی ءِ درشان کنگ ءَ اَنت۔