بلوچستان: یک انفارمیشنے ءِ سیاھیں ٹنگے
ٹی بی پی شونگال
بلوچستان دنیا ءِ واستا یک انفارمیشن بلیک ھولے بیتگ، ءُ اے دروشم ءِ برجم دارگ ءِ ھاتر ءِ واستا پاکستان ءِ مزن واکدار یکشل ءَ جتا جتائیں ھُنر ءُ ھِلہ کارمرد کنگ ءَ انت- ڈیھ ءِ پرنٹ ءُ الیکٹرانک میڈیا ءِ سر ءَ بلوچستان ءِ جاورانی سر ءَ گپ کنگ جرمے جوڑ بیتگ- ھما اھوالکار بلوچ جیڑہ ءِ سر ءَ نَد ءَ چِست کنت، آ ریاستی زوراکیانی نشانگ بیت- ھما سیاسی باسک راجی جیڑھاں دیم ءَ کار ایت، آ بندیگ کنگ بیت، ءُ دنیا ءَ بلوچستان ءِ سر بوگ ءَ موبائل انٹرنیٹ ءِ بندش وَ ھمک روچی کارے جوڑ بیتگ-
بلوچستان ءِ بازیں جاھاں پیش ءَ انٹرنیٹ سروس نیست انت، بس لھتے مزنیں شھراں موبائل انٹرنیٹ ھست انت- بلے شش اگست ءِ بیگاہ ءَ سیکیورٹی ءِ ناگیگیں جاورھالانی نام دیگ ءُ سرجمیں بلوچستان ءَ موبائل انٹرنیٹ ءِ سر ءَ بندش جنگ بیتگ-
پاکستان کمیشن برائے انسانی ھک ( ایچ آر سی پی) ءِ 9 تاں 12 جولائی 2025 ءِ فیکٹ فائنڈنگ ءِ رپورٹ ءِ رد ءَ، بلوچستان ءَ یک اجب رنگیں جاورے اتکگ: زورانسری بیگواھیانی درچ برجاہ انت، جمھوری آجوئیاں لپاشگ، اُستانی واکد گیش نیزور بیتگ، اھوالکاری ءِ سر ءَ بندش جنگ بیتگ ، ءُ کانون ءَ سر برزی کنوک بے لگام بیتگ انت- بلوچستان ءِ مھلوک ءِ درشاندابی ءُ سیاسی سنچ ءَ گیش دور برگ ءَ انت-
انفارمیشن ٹیکنالوجی ءِ اے دور ءَ انٹرنیٹ ءِ بندش ءِ درستاں گیش تاوان نودربر، تاجر، اے کامرس، موبائل بینکنگ ءُ فری لانسنگ ءَ بندوکاں سان کپ ایت- البت گھگیری زرمبشتاں ایشی ءِ سرجمیں سان نہ کپ ایت پرچاکہ انٹرنیٹ ءِ بندش ءِ سبب ءَ بس یک وھدے ءَ سرپدیانی دارگ بیت- بلے انفارمیشن ءَ داں سر بوگ ءَ گار کنگ دنیا ءَ کساسی رنگ ءَ بلوچستان ءِ زمینی راستیانی ھالانی دارگ وَس ءَ ڈن انت-