بلوچستان ءِ دمگ کیچ ءِ ھند تمپ ءَ پاکستانی پوج ءِ پلامرزی ٹولی ءُ سلاہ بندیں مردمانی میان ءَ میڑ ءَ پد، پوج ءَ سلاہ بند ءِ لاش دستیگ کنگ ءَ پد آئی ءِ دو براتاں ھوار سے مردم بیگواہ کتگ اَنت-
دمگی رسانکدر ءِ رِد ءَ میڑ ءِ وئیل گوستگیں روچ ءَ بیگاہ وھد ءَ بیتگ وھدے سرکاری پلامرزی دمگی سلاہ بندیں ٹولی ءَ یک لوگے ءِ سر ءَ اُرش کتگ اے میان ءَ اود ءَ ساڑی ئیں مردم ءَ گوں میڑ بیتگ چریشی ءَ پد پاکستانی پوج ءِ مزنیں کچے ءَ کارندہ وئیلجاہ ءَ سر بیتگ اَنت دمگ انگیر ءَ کتگ-
ھالانی رِد ءَ پاکستانی پوج ءَ اے میان ءَ میڑ ءَ بیران بیتگیں مردم ءِ لاش وتی دستیگ کتگ-
دمگی اِھوالکار ءِ رِد ءَ اے میڑ ءَ جبار ء دین محمد جھمنند تمپ بیران بیتگ وھدے کہ آئی ءِ دو برات امجد ء دین محمد ءُ راشد ء دین محمد ءِ ھمراھی ءَ ولید ء نظر نامیں مردمے ھم آوار جتگ ءُ وتی ھمراھی برتگ اَنت-
اشی ءَ پد اے سئیں مردم زورانسری بیگواھی ءِ نشانگ بیتگ اَنت-
دمگی رسانکدر ءِ رِد ءَ میڑ ءَ پوج ءِ پلامرزی ءِ ٹولی ءِ باسک ءَ ھم جانی تاوان چست کنگ کپتگ، بلے اے درگت ءَ گیشیں سرپدی نہ رس اِتگ-