بلوچستان ءَ زورانسری آوار جنی ءِ دْرچ یکشل ءَ برجاہ ءَ اِنت، یک مردمے بیگواہ یکے آجو بیتگ-
بلوچستان ءِ دمگ چہ مستونگ ءَ سربیتگیں ھالانی رِد ءَ شش اگست ءِ بیگاہ ءَ پاکستانی پوج ءَ مستونگ ءِ سٹی ھند سر ءَ برجاہ یک لوگے ءِ سر ءَ بیڑبرتگ یک نودربرے آوار جنگ ءَ پد بیگواہ کتگ-
چمّگدان ءُ سانمندیں کھول ءِ رِد ءَ سادھیں پوشکانی تہ ءِ کارندھانی ھمراھی ءَ فرنٹیئر کور ” ایف سی ” ءِ کارندھاں بیڑبرتگ میدین ء غلام قادر دھوار آوار جنگ ءَ پد ناشناسیں جاھے ءَ برتگ-
میدین دھوار کہ دمگی کالج ءِ نودربرے گوشگ بیگ ءَ اِنت کہ آئی ءِ درگت ءَ کھول ءَ تُرس درشان کتگ کہ آ ناں تھنا آئی ءِ چُک ءِ سلامتی درگت ءَ ھچ وڑیں سرپدی نیست-
زانگ بہ بیت کہ بلوچستان ءَ درکانودی دزگیری ءُ زورانسری آوار جنی ءِ نوکیں گپے نہ اِنت، انسانی کارکنان ءُ گل دراجیں وھدے ءَ چہ اے وئیلانی ھلاپ ءَ توار چست کنگ ءُ آیگ ءَ اَنت بیگواھیں مردمانی یل کنائینگ ءِ لوٹ کتگ-
ھمے وڑ لھتے روچ ءَ ساری شال ءَ چہ کلی قمبرانی پاکستانی پوج ءِ دست ءَ زورانسری آوار جنی ءِ نشانگ بیتگیں محسن شاھوانی ء دین محمد شاھوانی مروچی آجو بیتگ-