بلوچ سیاسی رھشونانی دزگیر کنگ ءُ زورانسری بیگواہ کنگ ءِ ھلاپ ءَ مروچی ھم کراچی ءُ اسلام آباد ءَ زھرشانی نندانک برجاہ بیتگ انت-
بلوچستان ءَ بلوچ یکجھتی کمیٹی ءِ سروکانی دزگیری، انساپ ءِ نہ بیگ ءُ چہ کراچی ءُ بلوچستان ءَ زورانسری بیگواہ کنگ بوتگیں مردمانی کراچی ءُ اسلام آباد ءَ پریس کلبانی دیم ءَ زھرشانی نندانک دیان ءَ وتی نزیکیں مردمانی یل دیگ ءُ انساپ ءِ لوٹ ءَ کنگ ءَ انت-
اسلام آباد ءَ برجاھیں زھرشانی نندانک ءَ مرچی 23 روچ سرجم بوتگ، زھرشانی کنوک بی وائی سی ءِ سروکانی سیاسی دزگیری، آمید گس ءِ نیمگ ءَ انساپ ءِ نہ بوھگ ءُ بلوچستان ءَ زورانسری ءَ بیگواہ کنگ ءِ ھلاپ ءَ زھرشانی کنگ ءَ اَنت۔
اے درچ ءِ سر ءَ زھرشانی ءَ نندوکاں گوں بلوچ راج ءَ ھوار کُل تبک ءُ شھری ءُ سرپدیں مردماں چہ دزبندی کتگ کہ اے زھرشانی ءَ ھوار بہ بنت ءُ آیانی توار بہ بنت ۔
آیاں گوشتگ کہ داں آھانی بندجگیں مردم یلہ کنگ نہ بنت ءُ انساپ ءِ پھجارینگ نہ بیت آ زھرشانی ءَ برجاہ دار اَنت۔
اے میان ءَ بازیں سیاسی ءُ انسانی ھکانی جھدکار زھرشانی بنجل جاہ ءَ اتکگ اَنت ءُ گوں کھولانی مردماں یکجھتی ءِ درشان اش کتگ بلے اسلام آباد پولیس ءَ آھانی دیم ءَ آڑانک برجاہ داشتگ انت۔
دومی نیمگ ءَ کراچی ءِ دمگ لیاری ءَ بیست ءُ پنچ سالی نودربر زاھد علی ءِ زورانسری بیگواھی ءِ ھلاپ ءَ کراچی پریس کلب ءِ دیم ءَ زھرشانی بنجل مرچی سیمی روچ ءَ برجاہ اِنت۔
زاہد علی 17 جولائی 2025 ءَ پاکستانی لشکر ءِ دست ءَ دزگیر کنگ ءَ پد بیگواہ کنگ بوتگ ءُ آئی ءِ لوگ ءِ مردم آئی ءِ یل کنگ ءِ لوٹ ءَ کنگ ءَ انت-
کھول ءِ مردمانی گشگ ءِ رد ءَ زاھد علی کراچی یونیورسٹی ءَ میان اُستمانی تک ءِ نودربر انت۔ آئی ءَ رکشہ ءِ پارٹ ٹائم ءِ سر یَ کار کتگ کہ نہ ایوک ءَ وتی وانگ ءِ ھرچ ءُ درچ کش اتگ بلکیں وتی ھاندان ءِ مالی لوٹاں ھم پیلو ءَ کنگ ءَ بیتگ۔
آئی ءِ پت عبدالحمید کوھنیں ہپاٹائٹس ءِ نادراہ اِنت ءُ وتی زھگ ءِ آیگ ءِ ودار ءَ گیش تلوسگ انت۔ کھول ءَ لوٹ کتگ کہ زاہد علی زوت دیم ءَ آرگ بہ بیت ءُ زوت یل کنگ بہ بیت۔