ھمے سال ءِ جون ءَ بلوچستان ءِ دمگ مستونگ ءَ پاکستانی لشکر ءِ تیرگواری ءَ بیران بوتگیں ورناہ سید احسان شاہ ءِ مات ءَ کوشکار ءِ ھلاپ ءَ کارروائی نہ کنگ ءَ شال پریس کلب ءِ دیم ءَ دھرنا داتگ-
شانزدہ سالی ئیں احسان شاہ 3 جون ءَ مستونگ ءِ نزیک ءَ فورسز ءِ تیرگواری ءَ بیران بیتگ کہ آ مزنیں ائید ءَ چہ لھتیں روچ پیسر گوں وتی سنگت ءَ چہ شال ءَ واتر بوھگ ءَ بوتگ۔
احسان شاہ ءِ پت عارف شاہ ءِ گشگ ءِ رد ءَ آ وتی کسانیں برات ءُ گوھارانی واستا عید ءِ شاپنگ ءَ شتگ بیتگ۔ واتر بوھگ ءِ وھد ءَ ایف سی ءِ کارندھاں آئی ءِ سر ءَ تیرگواری کتگ ءُ آئی ءِ زھگ احسان شاہ بیران بوتگ ءُ آئی ءِ ھمراہ شعیب ٹپی بوتگ۔
احسان شاہ ءِ مات ءُ پت ءَ اے وئیل ءَ پد شال ءُ مستونگ ءَ بازیں پریس کانفرنس کتگ ءُ چہ دمگی انتزامیہ ءَ لوٹ کتگ کہ آ تیر گواری کنوکین زمہ واریں کارندھانی ھلاپ ءَ ایف آئی آر درج بہ کنت بلے ھچ وڑیں گامگیج زورگ نہ بوتگ۔
پد ءَ آمیدگس ءَ دیم دیگ بوتگ کہ آئی ءِ پرمان ءِ سر ءَ ناشناسیں پاکستانی لشکر ءِ کارندھانی ھلاپ ءَ کیس درج کنگ بوتگ بلے سانمندیں مردم ءِ کھول ءِ گْوشگ ءِ رد ءَ تاں انوگ ءَ ھچ کارندہ ءِ ھلاپ ءَ کارروائی کنگ نہ بوتگ۔
احسان شاہ ءِ مات ءِ گشگ انت کہ انساپ دیگ ءِ بدل ءَ آئی ءُ آئی ءِ لوگ ءِ مردم تنگ کنگ بیگ ءَ انت۔
کُشگ بوتگیں ورنا ءِ مات ءِ گشگ ءِ رد ءَ وھدے آئی ءِ مرد کیس درج کنگ ءِ ھاتر ءَ مستونگ تھانہ ءَ شتگ گڑا آئی ءَ را دھمکی دیگ بوتگ کہ اگاں تو ایف آئی آر درج کن ئے گڑا آئی ءَ را گیشتر تاوان دیگ بیت ءُ چہ کار ءَ ھم در کنگ بیت۔ وھدے کہ منی مرد ءَ ایف آئی آر درج کنگ ءِ سر ءَ زور دات گڑا آئی ءَ را گْوشگ بوت کہ ڈی سی ءَ چہ پرمٹ بہ زور۔ وھدے آ ڈپٹی کمشنر ءِ گور ءَ شتگ گڑا ڈی سی ءِ رویش ھمیش ات۔ آئی ءَ را گْوشگ بوتگ کہ اگاں تو ھرچ وڑیں کارروائی بہ کن ئے گڑا چہ وتی کار ءَ کشگ بیت۔
آئی ءَ گْوشتگ کہ منی چک ءِ کوشکار آمیدگس ءِ دیم ءَ آرگ بہ بنت ۔ اگاں آئی ءَ کارے کتگ گڑا بیا ءُ مارا سبوت بہ دے ات ھرکس زانت منی چک ایف سی ءَ کُشتگ۔ کودکیں شانزدہ سالی ئیں زھگ نھ کلاس ءَ بوتگ آ پرچا کُشگ بوتگ؟ آئی ءِ گناہ چے بوتگ؟ چے گناہ ات؟ من ءَ گْوشگ بہ بیت، من انساپ ءِ لوٹوکیں زوراکیں مات آں، من ءَ انساپ دیگ بہ بیت۔
مات ءَ گْوشتگ کہ منی چک ءِ میار بس ھمے انت کہ آ بلوچ نودربرے ۔ مئے پھریزگ ءِ نام ءِ سر ءَ ہما کہ کُشندہ راھانی سر ءَ اوشتاتگ انت آھاں منی چُک ءِ تہ ءَ چے دیستگ؟ بیا انت من ءَ بہ گْوش انت من زان آں کہ سرکار ءِ تہ ءَ نشتگیں مردم ھم ھمے ادارھانی کاسگ چٹ اَنت کہ بلوچ نسل کشی ءِ تہ ءَ ھوار اَنت ءُ من ءَ بزاں مجبوریں مات ھم بھتام جنگ ءَ چک ءُ پد نہ بیت۔