پاکستانی لشکر ءَ آپریشن ءِ وھد ءَ دروگیں میڑ ءَ یک مردمے کشتگ ۔
بلوچستان ءِ دمگ کلات ءِ مھلبی ءُ آئی ءِ کش ءُ گوراں پاکستانی لشکر ءِ نیمگ ءَ فوجی آپریشن برجاہ اِنت کہ ایشی ءِ تہ ءَ ھیلی کاپٹر ھم ھوار اَنت۔
چمدیستگیں مردمانی رد ءَ کاؤنٹر ٹیررازم ڈیپارٹمنٹ ءِ بندیگی ءَ یک مردمے کشتگ ءُ دگ ءِ کش ءَ لاش دور داتگ- کُشتگین ءِ پجار انگت ءَ نہ بیتگ-
زانگ بہ بیت کہ اے وئیل ھما وھد ءَ بیتگ کہ دمگی مردماں قلات ءَ فورسز ءِ آپریشن ءُ دمگ ءِ سیکورٹی ءِ ترندیں سیکورٹی ءِ جاورھال داتگ انت-
کلات ءِ جتا جتائیں دمگاں پاکستانی لشکر گوستگیں دو روچاں چہ زمینی ءُ برزی آپریشن کنگ ءَ انت۔
گوستگیں ماہ ءِ گڈسر ءَ پاکستانی لشکر ءَ کلات ءِ دمگ ءَ مزنیں کچے ءَ آپریشن ءَ پد سئے مردمانی لاش چگل داتگ ات انت کہ آیانی دیم ءَ تیزاب ءِ ریچگ ءَ چہ دیم ءِ دروشم ھراب بوتگ اَنت۔ لاشانی ٹپ ءُ ٹور کنگ ءَ پد انگت ءَ آھانی پجار نہ بوتگ۔