کراچی : زاھد بلوچ ءِ یل کنائینگ ءِ ھاتر ءَ برجاھیں زھرشانی بُنجل ءِ دومی روچ، ھیومن رائٹس کمیشن ءِ یکجاھی درشان

کراچی ءِ دمگ چہ لیاری ءَ سیادی داروکیں بیست پنچ سالی ئیں نودربر زاھد علی ءِ زورانسری آوار جنی ءِ ھلاپ ءَ کراچی پریس کلب ءِ دیم ءَ زھرشانی بُنجل ءَ مروچی دومی روچ ءَ ھم برجاہ-

زاھد علی ھپدہ جولائی دوھزار بیست پنچ ءَ پاکستانی پوج ءَ دزگیر کنگ ءَ پد بیگواہ کتگ اَت –

کھول ءِ رِد ءَ زاھد علی کراچی یونیورسٹی ءَ میان اُستمانی سیادی ءِ پڑ ءِ نودربر اِنت ءُ رکشہ چلائینتگ ءُ ناں تھنا وتی وانگ ءِ ھرچ کش اِتگ اَنت بلکیں لوگ ھم لاپ داتگ آئی ءِ پت یک کوھنیں ھیپاٹائٹس نادُراھے ءُ وتی چُک ءِ زراں چہ الاج کتگ-

زاھد ءِ زورانسری آوار جنی ءَ کھول گمانی تہ ءَ اِنت، وھدے کہ لیاری ءِ زانشتی پارٹی ھم تُرس ودی اِنت، زاھد ءِ زوت یل کنائینگ ءِ لوٹ ءِ ھمراھی ءَ آئی ءِ کھول ءُ چاگردی کارکنان ءَ کراچی پریس کلب ءِ ڈن ءَ زھرشانی بُنجل جتگ کہ یکشل ءَ دومی روچ ءَ ھم برجاہ ءَ اِنت-

مروچی ھیومن رائٹس کمیشن آف پاکستان ءِ یک ٹولی یے زھرشانی بُنجل ءَ اتکگ ءُ سانمندیں کھول ءَ گوں یکجاھی درشان کتگ، ٹولی ءُ قاضی خضر، ڈاکٹر توصیف احمد، سعدیہ بلوچ، محمد ثاقب، علی اوسط ، ڈاکٹر سعید عثمانی ءَ ھوار دگہ انسانی ھکانی کارکن ھوار اَنت-

ٹولی ءَ واکدار ءَ چہ لوٹ کتگ کہ زاھد علی ءَ زوت آمیدگس ءَ پیش بہ کن اِت ءُ یل بہ کن اِت-

ھیومن رائٹس کمیشن ءَ گوشتگ کہ زورانسری آوار جنی انسانی ھکانی سنگین ءِ ھلاپ ورزی اِنت ءُ ریاستی ادارہ اے درکانودی کار ءَ ھلاس بہ کن اَنت-