تُربت : پوج ءِ آپریشن، کسان سالی ئیں بچکے ءَ ھوار دو مردم زورانسری بیگواہ

تُربت ءَ پاکستانی پوج ءِ آپریشن ءِ میان ءَ زورانسری آوار جنی ءِ نشانگ بیتگیں مردمانی پجّار بیتگ اَنت-

بلوچستان ءِ دمگ چہ کیچ ءَ سربیتگیں ھالانی رِد ءَ گوستگیں شپ ءَ پاکستانی پوج ءَ تربت ءِ دمگ گوکدان انگیر ءَ کنان ءَ سرچ آپریشن بندات کتگ ءُ بازیں دمگی دمگ مردمے لَٹ ءُ کُٹانی نشانگ کتگ اَنت-

اھوالکار ءِ رِد ءَ شپ ءِ کساس دہ ءَ سوراب پُل ءِ ھند سر ءَ پوج ءِ گاڑی سر ءَ بمب اُرش ءَ پد پاکستانی پوج ءَ پسّھی کاروائی ءَ دمگ سرچ آپریشن کنان ءَ یک کسانیں بچکے ءَ ھوار دو مردم آوار جتگ ءُ وتی ھمراھی ءَ برتگ اَنت کہ چریشی ءَ پد دوئیں مردم بیگواہ اَنت-

زورانسری آوار جنی ءِ نشانگ بیتگیں مردمانی پجّار فضل الھی ء الھی بخش ءُ زید ء زاھد علی ءِ نام ءَ چہ بیتگ اَنت-

فضل الھی ءِ کھول ءِ رِد ءَ آ یک بلاھیں نادُراھی ءِ آماچ اِنت ءُ الاج بیگ ءَ اِنت آ دمگی مسیت ءِ پیش امام ءِ چُک اِنت-

کھول ءَ انسانی ھمدردی ءِ بُنیاد ءَ فضل الھی ءُ دکان ءَ آئی ءِ گوم ءَ کار کنوکیں کسان سالی ئیں بچک ءِ یل کنائینگ لوٹ کتگ-