گوادر ءُ تربت ءَ دو مردم بیگواہ، چہ مستونگ ءَ سَے کس یل بیتگ انت

بلوچستان ءِ تیابدپی شھر گوادر ءُ تربت ءَ پاکستانی لشکر ءَ دو مردم دزگیر کتگ انت ءُ مستونگ ءَ سئے ورنا چار سال ءَ پد یل بیتگ ءُ وتی گِساں سر بیتگ انت-

دمگی مردمانی رد ءَ گوادر ءَ ٹی ٹی سی کالونی ءِ نندوکیں عبدالحمید ء امام بخش 5 اگست ءَ پاکستانی لشکر ءَ چہ وتی لوگ ءَ دزگیر کتگ ءُ پد ءَ آئی ءِ ھچ ھال نیست انت ءُ آئی ءِ دزگیر کنگ ءِ سرکاری رنگ ءَ پدر نہ بوتگ۔

ھمے وڑ کیچ ءِ دمگ تمپ ءَ پاکستانی لشکر ءَ یونیورسٹی آف انجینئرنگ اینڈ ٹیکنالوجی لاھور ایم فل اسکالر سنجر صادق دزگیر کنگ ءَ پد بیگواہ کتگ-

کھول ءِ رد ءَ سنجر صادق کمپیوٹر سائنس ءِ پٹ ءُ پولکارے بیتگ ھمے زوتاں گرماگ ءِ موکلانی ھاتر ءَ گِس ءَ اتکگ – آئی ءِ دزگیری ءَ پد آئی ءِ بارو ءَ ھچ وڑیں اھوال دیم ءَ نیتکگ انت ءُ نانکہ آئی ءِ بارو ءَ کانونی کاروائی کنگ بیتگ-

بلوچستان ءَ بازیں وھدے ءَ چہ زورانسری بیگواہ کنگ ءِ وئیل بوگ ءَ انء کہ ایشی ءِ سر ءَ دمگی ءُ میان اُستمانی انسانی ھکانی گل یکشل ءَ ایشانی دارگ ءِ جھد ءَ توار چِست کنگ ءَ انت-

دومی نیمگ ءَ مستونگ ءِ دمگ کردگاپ ءِ سئے ورنا ذاکر احمد سرپراہ، راشد احمد سرپرہ ءُ جاوید احمد سرپرہ چار سال ءِ دراجیں بیگواھی ءَ پد یل بیتگ انت ءُ وتی گساں واتر کنگ بوتگ انت۔