بلوچ لبریشن آرمی ءِ جارکش جیئند بلوچ ءَ رسانکدراں وتی شنگ کرتگیں درشان ءِ تہ ءَ گوشتگ کہ سرمچاراں زامران ، ڈھاڈر ءُ مستونگ ءَ پنچ اُرش کتگ انت کہ اود ءَ پاکستانی پوج ، مادن ءُ راشن بروکیں گاڑی نشانگ کتگ انت ۔
جارکش ءَ گوشتگ ءَ کہ بلوچ لبریشن آرمی ءِ سرمچاراں گوستگیں روچ ءَ زامران ءِ دمگ جابشان ءَ زورگریں پاکستانی پوج ءِ سر ءَ ھما وھد ءَ ریموٹ کنٹرول بمب اُرشے کتگ کہ وتی پانگس ءِ ھاتر ءَ آپ برگ ءَ بوتگ انت ۔ تراک ءِ زد ءَ اتکگیں دو پوجی کارمند زدگ بوتگ انت ۔
آئی ءَ گوشتگ کہ بی ایل اے ءِ سرمچاراں آدینگ ءِ شپ ءَ ڈھاڈر ءِ دمگ سنی شوران ءَ زورگریں پوج ءِ بنجاھی ءِ بنجل ءِ گیٹ ءِ دپ ءِ کارمندانی سر ءَ اُرش کتگ ۔ اے اُرش ھما وھد ءَ کنگ بوتگ وھدیکہ پوج ءِ چار کارمند ھمود ءَ اوشتوک بوتگ انت ۔ اَرش ءِ آسر ءَ زورگریں پوج ءَ جانی ءُ مالی تاوانانی دیمپانی کنگ کپتگ ۔ اَرش ءَ پد ترس آماچیں پوج ءَ لس مھلوک ءِ سر ءَ ماٹر گولہ آس داتگ ۔
جارکش ءَ گوشتگ کہ بلوچ لبریشن آرمی ءِ سرمچاراں شمبے ءِ روچ ءَ مستونگ ءَ گلام پڑنز ءَ بلوچ راجی مڈیانی لٹ ءُ پل کنوکیں دو گاڑی نشانگ کتگ انت ۔ سرمچاراں ڈرائیور سرپد کتگ ءُ یل داتگ انت۔
جارکش ءَ گوشتگ کہ بلوچ لبریشن آرمی ءِ سرمچاراں گوستگیں روچ ءَ مستونگ ءِ دمگ اسپلنجی ، مرو ءَ زورگریں پاکستانی پوج ءِ ھاتر ءَ راشن بروکیں دو ٹرک گپتگ انت ۔
آئی ءَ گوشتگ کہ سرمچاراں مروچی تگران ءِ دمگ ابدوئی ءَ زورگریں پوج ءِ ھاتر ءَ راشن بروکیں یک ٹرکے مانداشتگ ۔
درشان ءِ گڈسر ءَ جارکش ءَ گوشتگ کہ بی ایل اے ھما درسیں ٹرانسپورٹراں مکن کنت کہ پہ زورگریں پوج ءِ ھاتر ءَ راشن بر انت یا مادن برگ ءَ انت ، آ وتی اے کار ءَ یل بہ کن انت ۔ اگاں ناں گڑا آیانی گوم ءَ ھم ھمے وڑ بیت کہ مروچی پوج ءِ ھاتر ءَ راشن بروکانی بوتگ ۔