بلوچستان ءِ دمگ پنجگور ءَ مرچی ورنا شاہ جان ء مراد ءِ ٹپ ءُ ٹوریں لاش دست کپتگ۔
شاہ جان ھمے سال ءِ 29 جولائی ءَ آئی ءِ آروس ءَ تھنا دَہ روچ ءَ پد ریاستی ڈیتھ اسکواڈ ءِ کارندہاں زورانسری بیگواہ کتگ۔ آئی ءِ کھول ءُ دمگی مردمانی گشگ ءِ رد ءَ آئی ءَ را ایف سی کیمپ پنجگور ءَ برگ بوتگ کہ چہ اود ءَ آئی ءِ بابت ءَ ھچ وڑیں ھال ءُ اھوال دیگ نہ بوتگ۔ مرچی اناگہ ءَ آئی ءِ لاش ٹپ ءُ ٹوریں جاوراں دست کپتگ۔
بلوچستان ءَ سالانی سال اِنت کہ زوراکی ءَ بیگواہ کنگ ءِ جیڑھ ءِ دلگوش ءِ مرکز بوتگ کہ اودا سرکاری ادارہانی نیمگ ءَ درجناں ورنا آوار جنگ بوتگ اَنت۔ بازیں مردم انگت گار اَنت ءُ بازیں مردمانی لاش رند ءَ ٹپ ءُ ٹوریں جاوراں دست کپ اَنت۔
زانگ بہ بیت دو روچ ءِ تہ ءَ پنجگور ءَ اے دومی وئیل انت۔ گوستگیں روچ ءَ پنجگور ءِ دمگ پروم ءَ چہ یک کوھنیں ٹپ ءُ ٹوریں لاشے دزکپتگ ات ب کہ آئی ءِ پجار عنایت اللہ ء ھیر مھمد ءِ نام ءَ زانگ بوتگ ات۔
عنایت اللہ گوستگیں سال ءِ دسمبر ءِ بندات ءَ گاڑی سواراں آوار جتگ ات۔ آئی ءِ لوگ ءِ مردمانی گشگ ءِ رد ءَ ”ڈیتھ ءِ اسکواڈ“ ءِ کارندھاں آ چہ لوگ ءَ آوار جتگ۔