بلوچ یکجھتی کمیٹی ءِ بنجاھی رھشون ڈاکٹر صبیحہ بلوچ ءِ بیگواہ بوتگیں پت یل کنگ بیتگ-
ڈاکٹر صبیحہ بلوچ ءَ وتی پت ءِ یل ھال ءَ راست کنان ءَ گشتگے کہ منی پت کہ 5 اپریل ءَ زورانسرء بیگواہ کنگ بوتگ آ مرچی سلامتی ءَ یل بیتگ ءُ لوگ ءَ سر بوتگ۔ اگاں من آئی ءَ گوں گند ءُ نند کُت نہ کناں بلے پہ من بس اِنت کہ من بہ زاناں کہ آ سلامت اِنت۔
آئی ءَ گوشتگ کہ اے ھما بدتریں زلم اِنت کہ یک مردمے ءَ زورانسری ءَ بیگواہ کنگ نہ ایوک ءَ آ مردم ءَ بلکیں آئی ءِ سرجمیں ھاندان ءَ دردناکی ءَ کنت۔ من اے درد ءَ چہ ھما وھد ءَ مار اِتگ کہ انگت منی وتی دروازگ ءَ سر نہ بوتگ اَت۔ ءُ اے ھما درد انت کہ من ءَ ھچ وڑ ءَ نندگ ءَ نیل ایت۔ اگاں من بے توار بوتیناں تاں اے آزاب ءَ من ءَ چہ اندر ءَ وارتگ ات۔
آئی ءَ گْوشتگ کہ من ھر وھد ءَ دمبرگ ءَ بوتگ آں گڑا یکشلیں چکاس منی ھوسلگاں پورشگ ءَ لگ اتگ انت گڑا یک ماتے ءِ چمّانی تہ ءَ رچوکیں ارس من ءَ ھلاس کن اَنت۔ آ اَرس منی پد ءَ واتر بوھگ ءِ راہ جوڑ بوتگ انت۔ بوت کنت کہ زندگی ءِ مول ءُ مراد ھمیش اِنت کہ دگراں اُمیت ءِ بھر کنگ ءُ بدل ءَ تھاری ءَ پہ وت ءَ اُمیت ءِ شوھازگ۔
آئی ءَ گیش گوشتگ کہ من اے گرانیں وھد ءَ مئے ھمراھی ءَ اوشتاتگیں ھرکس ءِ مھر ءُ یکجھتی ءِ سک باز منت وار آں ۔ منی دوا اِنت کہ درستیں زوراکیں بیگواھیں مردم سلامت وتی لوگاں واتر بہ بنت۔
ڈاکٹر صبیحہ ءَ گشتگ کہ اے زلم ءُ زوراکی ھر نھاد ءَ ھلاس کنگ بہ بنت۔ زبردستی بیگواہ کنگ مچانکی سزا ءِ بدترین دروشم اِنت ءُ ھرچ ھاندان ءَ اے ٹارچر ءِ آماچ کنگ سرجمیں جرمے ۔
زورانسری بیگواھیانی ھلاپ ءَ جھد آئینی ءُ کانونی اِنت ءُ اے جھد ءَ برجاہ دارگ مئے درستانی انسانی زمہ واری اِنت۔