کیچ ءِ دمگ بلیدہ ءِ ھند سر ءَ چہ سلو کوردیم ءَ یک مردمے ءِ لاش دزکپتگ – لیویز اِھوالکار رِد ءَ کُشگ بیتگیں مردم ءِ پجّار دل جان ء خدابخش جھمنند گردانک بلیدہ نام ءَ چہ بیتگ-
اِھوالکار رِد ءَ دل جان گوستگیں شپ ءَ کُشتگ ءُ آئی ءِ لاش سلوئی کوردیم ءِ دمگ ءَ چگل داتگ-
کُشگ بیتگیں بلیدہ ءِ دمگ گوچک ءِ جھمنند بیتگ- آ بیست دو جولائی ءَ بلیدہ ءِ دمگ میناز ءَ پرپٹ ءِ شر کنگ ءَ شتگ بیتگ اود ءَ چہ آوار جنگ بیتگ- آوار جنگ ءَ پد آ بیگواہ بیتگ- دل جان چار سال ءَ ساری ھم بیگواہ کنگ بیتگ ءُ چار ماہ ءَ پد آجو بیتگ اَت-
دمگی اِھوالکار گوشگ اِنت کہ آوار جنی ءَ ھمگرنچیں مردمانی سیادی سرکاری پلامرزی سلاہ بندین ٹولی ” ڈیتھ اسکواڈ ءَ بیتگ اَنت-
بلوچستان ءَ “ڈیتھ اسکواڈ ” مول ءُ مراد انچیں نیم فوجی یا بے رسمی سلاہ بندیں ٹولی اَنت کہ ریاستی چیردستی ءَ یا ریاستی ادارھانی بے تواریں پلامرزی ءَ چہ کار کن اَنت- اشانی کار مردمانی آوار جنگ، لَٹ ءُ کُٹ یا تیرگواری ءِ نشانگ کنگ اِنت- بلوچستان ءَ اے ٹولیانی سر ءَ انسانی ھکانی ھلاپ ورزی ءُ زورانسری آوار جنی وڑیں سنگین ءِ بھتام جنگ ءُ آیگ ءَ اَنت-