گوادر : برات ءِ زورانسری آوار جنی ءِ ھلاپ ءَ زھرشانی پُشدر ءَ تھانہ لوٹ، وانگجاہ ءَ چہ ھم نام در کنگ بوتگ

چہ گوادر ءَ سیادی داروکیں رخسانہ دوست ءِ گوشگ اِنت کہ آ بلوچستان ءَ زورانسری آوار جنی ءِ ھلاپ ءَ توار چست کنگ ءُ وتی برات ءِ یل کنائینگ ءِ ھاتر ءَ زھرشانی پُشدر ءَ تُرسینتگ برجاہ-

رخسانہ دوست کہ گوادر ءَ یک دمگی اسکول دی اوئیسس اسکول بستار ٹیچرے ءَ پیلو کنگ ءَ بیتگ مروچی اسکول انتزامیہ نیمگ ءَ چہ کار ءَ در کنگ ءِ کلوہ دیم دیگ بیتگ-

آئی ءِ گوشگ رِد ءَ آ تھنا ھمے ھاتر ءَ اسکول ءَ چہ در کنگ بیتگ اَنت آ وتی زورانسری بیگواھیں برات عظیم دوست ءِ یل کنائینگ ءِ ھاتر ءَ زھرشانی کنگ ءَ اِنت-

اشی ءَ ساری رخسانہ گوادر پولیس تھانہ ءَ لوٹ کتگ کہ اود ءَ آ پنچ کلاکاں چہ داشتگ، اے میان ءَ آ زھرشانی روانک ءِ بھر بیگ ءُ زھرشانی ءِ درگت ءَ جُست کتگ ءُ آ تُرسینتگ-

زانگ بہ بیت کہ رخسانہ دوست عظیم دوست بلوچ ءِ گْھار آ پاکستانی پوج ءَ سے جولائی 2015 ءَ چہ گوادر ءَ زورانسری بیگواہ کتگ اَنت، آ گوستگیں بازیں سالاں چہ وتی برات ءِ یل کنائینگ ءِ ھاتر ءَ گوادر ءَ ھوار جتاجتائیں شھراں زھرشانی ءُ نندانک ءَ بھر ئِے زرتگ-

رخسانہ ءَ اے درگت چہ گوشتگ کہ سسّائی دروشم ءَ جاڑیگ بیتگ آں کہ من سرپد بیتگ آں یک ناں یک روچے من آں اسکول ءَ در کن اَنت پرچاکہ اسکول ءَ ھم بیھار ءِ دیمپانی کنگ کپتگ ءُ مروچی اسکول انتظامیہ ءَ من آں کلوہ راہ دیگ بیتگ کہ ترا چہ اسکول ءَ در کتگ-

رخسانہ دوست گوش اِیت ما وتی جُھد ءَ برجاہ دار آں ءُ وتی برات ءِ یل کنائینگ ھاتر ءَ توار چست کن آں-

زانگ بہ بیت کہ چیزے روچاں گوادر ءَ زھرشانی ءُ مراگشاں سر ءَ درکانودی جارانی پاپندی جنگ بیتگ، وھدے کہ اے میان ءَ سیاسی کارکنان ءُ بیگواھیں مردمانی کھول پولیس ءِ نیمگ ءَ چہ تُرسینگ بیگ ءَ اِنت-

گوستگیں ھپتگ ءَ بلوچ ویمن فورم ءِ شلی بلوچ ءُ آئی ءِ ھمراہ ھما وھد ءَ دزگیر کتگ اَنت وھدے آ گوادر ءَ یک مراگشے ءَ ساڑی بیتگ اَنت، پد ءَ پولیس ءَ آ جتاجتائیں بھتام ءِ رِد ءَ تربت تھانہ برگ ءَ پد یل کتگ-

بلوچستان ءِ سیاسی ءُ چاگردی گلاں اے وئیل ایر جتگ اَنت، وھدے گوادر ءَ زالبول ءِ دزگیری ءُ تُرسینگ ءِ وئیلانی سر ءَ اکوام متھدہ ءِ انسانی ھکانی ءِ ھاتر ءَ نام گپتگیں نمائندگ، منی لاولر ءَ تُرندیں تُرس ءِ درشان کتگ-