کلات : پوج ءِ کاروان ءُ کُمک ءَ آؤکیں کارندھانی سر ءَ اُرش، پوج ءِ انگیر، بیرانیانی ھال

سے شمبے ءِ روچ ءَ بلوچستان ءِ دمگ کلات ءِ ھند کوھک ءَ پاکستانی پوج ءِ یک کاروان سر ءَ بلوچ سرمچارانی نیمگ ءَ چہ یک تُرندیں اُرشے کنگ بیتگ، چریشی ءِ آسر ءَ بازیں کارندھے بیران ءُ ٹپی بیگ ھال اِنت-

چمّگدیں شاھدانی رِد ءَ، اُرش بیگاہ ءِ وھد ھما وھد ءَ بیتگ وھدے پوج ءِ کاروان گوزگ ءَ بیتگ سرمچاراں سنگر گپتگ کاروان سر ءَ جتاجتائیں نیمگاں اُرش کتگ کہ مزنیں سلاہ کارمرز کنگ بیتگ-

اِھوالکار گوشگ اِنت کہ مزنیں کچے ءَ کارندہ جاہ پہ جاھی بیران یا کہ سک ٹپی بیتگ اَنت اُرشکارں پوج ءِ کارندہ ءَ انگیر ءَ کتگ بیتگ اَنت بلے سرکاری نیمگ ءَ ھچ وڑیں جانی تاوان ءِ پدری کنگ نہ بیتگ-

ھمے وڑ اُرش ءَ پد کُمک ءَ آؤکیں سر ءَ ھم اُرش کتگ – پاکستانی پوج ءِ گیشی کارندہ وئیلجاہ ءَ روگ ءَ بیتگ اَنت، آ ھم سرمچارانی نشانگ ءَ اَتکگ اَنت چریشی ءِ سوب ءَ دگہ یک میڑے بندات بیتگ-

بلوچستان ءَ پاکستانی پوج ءُ آجوئی لوٹوکانی میان ءَ اے ماہ ءَ گیشی گندگ اَتکگ- بلوچ آجوئی لوٹوکیں گلانی نیمگ ءَ چہ منّگ نہ بیتگ. بلے گوستانک ءَ اے وڑیں اُرشانی زمہ واری بلوچ لبریشن آرمی ( بی ایل اے ) ءُ دگہ سلاہ بندیں گلاں زرتگ اَنت-