کیچ: ورنایے زورانسری بیگواہ

بلوچستان ءِ دمگ کیچ ءَ سیادی داروکیں ورنا صدام ء مھراب پاکستانی لشکر ءَ دزگیر کنگ ءَ پد بیگواہ کتگ-

صدام بلوچ ءُ آئی ءِ ھمراہ گلزار نیک سال چہ تربت شھر ءَ دزگیر کنگ بیتگ اَنت۔ پد ءَ گلزار نیک سال پد ءَ شپ ءِ نیم ءَ یل کنگ بوتگ بلے صدام بلوچ ءِ بارو ءَ دگہ اھوال دیم ءَ نیتکگ انت-

صدام بلوچ سیادی کیچ ءِ دمگ سری شاپک ءَ انت کہ آ گلزار نیک سال ءِ ھمراھی ءَ کسانیں گیراجے ءَ مکینک ءِ کار ءَ انت-

کھول ءِ گْوشگ ءِ رد ءَ آ ھمک سھب ءَ وتی ھمک روچی ءِ وھد ءَ گیراج ءَ روگ ءِ ھاتر ءَ شتگ بیتگ بلے راہ ءَ پاکستانی پوج ءِ کارندھاں ھردوک دزگیر کتگ انت-

گلزار نیک سال ءَ را بازیں کلاکاں بندیگ کنگ ءَ پد شپ ءِ نیم 12 ءِ نزیک ءَ یل دیگ بیتگ۔

زانگ بہ بیت بلوچستان ءَ زورانسری بیگواہ کنگ ءِ وئیل نوک نہ انت ۔ انسانی ھکانی گلاں اے بیگواھیانی بابت ءَ باز رند ءَ وتی توار چست کتگ۔