اسلام آباد ءَ بلوچ گار ءُ بیگواھیں مردمانی کھول ءُ بلوچ یکجھتی کمیٹی ءِ دزگیریں رھشونانی یلہ کنائینگ ءِ ھاتر ءَ برجاھیں دھرنا ءِ چارُمی روچ پولیس ءِ بازیں کچے ءَ اسلام آباد پریس کلب ءِ درائیں چپ ءُ چاگردیں دگ بند کُتگ اَنت ءُ تار ءُ سیم جَتگ اَنت ءُ ھر وڑیں مردم یا کہ موٹلے ءَ را پریس کلب ءِ نیمگ ءَ روگ ءِ موکل دیگ نہ بوگ ءَ اِنت۔
ھمے موہ ءَ جماعت اسلامی پاکستان ءِ رھشون ءُ باسک سینیٹر مشتاق احمد ھان ءَ اسلام آباد پریس کلب ءِ دیم ءَ پولیس ءِ داشتگیں بازیں کچے ءَ ءُ چہ بلوچستان ءَ آتکگیں چہ گار ءُ بیگواھیں کھول ءِ زھرشانی ءَ را دارگ ءِ کوشست کُتگ۔
آئی ءَ گْوشتگ کہ پریس کلب ءِ دیم ءَ اسلام آباد پولیس ءِ نیمگ ءَ لھتے بے کسیں بلوچ جنکانی دزگیر کنگ ءِ کوشست اے گپ ءِ سبوت ءَ دنت کہ سرکار اے نزوریں تواراں چہ ترسگ ءَ نہ اِنت، بلکیں چہ وتی زھرناکیں پالیسیانی پدر کنگ ءُ زوریں بیگواہ کنگ ءِ وڑیں ریاستی زُلم ءُ زوراکیاں ترسگ ءَ اِنت۔
دیمتر ءَ مشتاق احمد ھان ءَ گوں مزنیں مشکلے ءَ گوں بے کسیں بلوچ ءِ گوم ءَ یکجاھی درشان کنگ ءَ اسلام آباد پریس کلب ءَ سر بوگ ءَ سوبین بوتگ پرچا کہ سرجمیں دمگ ءَ مارشل لاء روان اَت۔
آیاں لوٹ کتگ کہ اے زلم ءُ زوراکی بند کنگ بہ بیت، زوراکی ءَ بیگواہ کنگ ھلاس کنگ بہ بیت ءُ زوراکی ءَ بیگواہ بوتگیں درستیں مردم زوت یلہ کنگ بہ بنت۔ گوش بہ کن بلوچستان ءِ توار ءَ۔
زانگ بہ بیت گوستگیں چار روچاں بلوچ یکجھتی کمیٹی ءِ دزگیریں رھشونی ءُ پہ زور بیگواھیں مردمانی کھول ءَ ماں اسلام آباد ءَ زھرشانی ءِ دھرنا کنگ ءَ انت ۔
مرچی زھرشانی کنوکاں چہ پریس کلب ءَ روگ ءَ مکن کنگ بوتگ ءُ آھانی گْوشگ ءِ رد ءَ آھانی دزگیر کنگ ءُ پہ زور پد ءَ بلوچستان ءَ دیم دیگ ءِ تیاری بیگ ءَ اِنت۔
اے موہ ءَ پولیس ءِ کر ءَ بسے ھم ساڑی اِنت کہ زھرشانی کنوک پہ زور پد ءَ بلوچستان ءَ دیم دیگ بہ بنت۔
اے موہ ءِ سر ءَ جتاجتائیں سیاسی ءُ چاگردی گلانی جھدکار ءُ انسانی ھکانی جھدکار ساڑی بوتگ اَنت ءُ گوں زھرشانی کنوکاں ھوری ءِ درشان کنگ ءَ ھم ھوار بوتگ اَنت۔