بلوچ یکجھتی کمیٹی ءِ رھشون ڈاکٹر صبیحہ بلوچ ءِ لوگ ءِ سر ءَ پوج ءَ بیڑبرتگ

پوج ءَ بی وائی سی ءِ زالبولیں رھشون ءِ لوگ ءِ سر ءَ بیڑبرتگ ءُ پٹ ءُ پول کتگ-

بلوچ یکجھتی کمیٹی ءِ رھشون ءُ بلوچ اسٹوڈنٹس ایکش کمیٹی ءِ گوستگیں چیئرپرسن ڈاکٹر صبیحہ بلوچ ءَ یک درشانے ءَ ریاستی زوراکی تُرندی ءَ ایر جنان ءَ میان استمانی ادارھاں دزمانجی ءِ دزبندی کتگ-

ڈاکٹر صبیحہ بلوچ رِد ءَ مروچی بیگاہ ءِ ساھت ھپت ءِ نزیک ءَ پاکستان ءِ وفاقی کانسٹیبلری ایف سی ءَ آیانی میتگ ءَ برجاہ لوگانی سر ءَ بید ھال دیگ یا کہ کانودی ھساب ءَ بیڑ برتگ، بیڑبرگ ءِ میان ءَ کھول ءُ تُرسینتگ ءُ بیھار داتگ اَنت-

زانگ بہ بیت کہ ڈاکٹر صبیحہ بلوچ ءِ پت ءَ سے ماہ ءَ ساری پوج ءَ دزگیر کتگ ءُ بیگواہ کتگ اَت کہ انگت بیگواہ ءَ اِنت آئی ءِ درگت ءَ ھچ وڑیں ھال دیگ نہ بیتگ-

ڈاکٹر صبیحہ بلوچ ءَ گوشتگ کہ آیانی سر ءَ یکشل ءَ زور دیگ بیگ ءَ اِنت کہ آ بلوچ یکجھتی کمیٹی ءَ چہ دزکشی ءِ جار ءَ بجنت یا کہ وت دزگیری بدنت-

وتی درشان ءَ ڈاکٹر صبیحہ ءَ گْوشتگ کہ منی پت ءِ یکیں جرم منی پت بیگ اِنت ءُ منی جرم انسانی ھکانی لگتمالی ءِ ھلاپ ءَ گپ کنگ اِنت-

آئی ءَ گْوشتگ اے مچی سزا گوں مھکمی ءِ دْرچ اِنت ھمے مول ءُ مراد ءَ مارا تُرسین اِیت ءُ بے توار کنگ اِنت-

آئی ءَ دیمتر ءَ گْوشتگ کہ بلوچ راج پُرایمنیں گھگیری ءَ ریاست زورانسری آوار جنی ءِ دروگیں پروپیگنڈ ءَ ءُ بیھاراں چہ ایرموش کنگ ءِ جُھد ءَ اِنت مارا ناشرکار گوش اِیت ءُ ھلاس کنگ ءِ پندل سازی کنگ بیگ ءَ اِنت وھدے کہ ما انسانی ھکانی پھازوکاں انساپ ، راستی ءُ انسانیت ءِ ھاتر ءَ توار چست کنگ ھچ وڑیں جرمے نہ اِنت-

آئی ءَ میان استمانی ادارہ ھسکار. ایمنسٹی انٹرنیشنل، ھیومن رائٹس واچ، اکوام متھدہ ءِ انسانی ھکانی ادارہ ، یورپی یونین، سیویکس، آئی سی جے، ریپریو ءُ فرنٹ لائن ڈیفینڈرز ءَ چہ دزبندی کتگ کہ آ اے ریاستی زوراکی ءِ ھلاپ ءَ توار چست بکن اَنت-

آئی ءَ گُڈی ءَ گْوشتگ کہ بلوچستان ءَ ھرچ چُک اے اُمیت ءَ مزن بیت کہ آ یک روچے وتی سرڈگار ایمنی گند اِیت اے جُھد ءِ دزی، ھکیکت اَنت اے اُمیت ءِ پچگرگ اِنت ءُ ما اشی ءَ ھچبر اوپار نہ کن ایں-