بلوچستان ءِ دمگ پنجگور ءَ ناشناسیں مردماں ورنایے آوار جتگ ءُ کُشتگ۔ کشگ بیتگیں مردم ءِ پجار پرویز محمد عمر ءِ نام ءَ بوتگ کہ لھتیں روچ پیسر چہ وتی لوگ ءَ آوار جنگ بوتگ۔
دمگی مردمانی رد ءَ 5 جولائی ءِ شپ ءِ 10 بج ءِ نزیک ءَ پنچ سلاہ بندیں مردماں گوں گاڑی ءَ پرویز محمد عمر چہ گرمکان ءَ وتی لوگ ءَ زورانسری برتگ۔
کھول ءِ گْوشگ اِنت کہ پرویز ءِ برگ ءَ پد آئی ءِ بابت ءَ ھم ھچ زانگ نہ بیتگ۔ بازیں روچانی پٹ ءُ پول ءَ پد آئی ءِ جون 11 جولائی ءَ پنجگور ءِ دمگ چہ شاھو کھن ءَ دزکپتگ-
لاش پہ پجار ءِ ھاتر ءَ پنجگور ٹیچنگ ھسپتال ءَ برگ بوتگ، ڈاکٹراں اے گپ ءِ پدرائی کتگ کہ کشگ بیتگیں مردم ءِ سر ءَ تیرگواری کنگ ءُ لاش ءَ را لٹ ءُ کٹانی نشان پِر انت-
زانگ بہ بیت کہ پنجگور ءَ گوستگیں ماھاں بے امنی، مردم کُشی، ھرابکاری، دُزی، ءُ آوار جنگ ءِ ویل گیش بوتگ اَنت۔ اے جاور ھالانی رد ءَ جماعت علماء اسلام پنجگور ءَ 13 جولائی 2025 ءَ یک شمبے ءِ روچ ءَ مدرسہ خدا آبادان پنجگور ءَ سھب ءِ 10بج ءَ مزنیں راجی امنی جرگھے برجم دارگ ءِ جار جتگ ات۔
پارٹی ءِ جارکش ءِ رد ءَ اے جرگہ ءَ درستیں سرپدیں شھری، ٹکی کماش، سیاسی ءُ چاگردی رھشون، ءُ امن لوٹوکیں مردماں بھر زورگ ءِ داوت دیگ بوتگ دانکہ بے امنی ءِ ھلاپ ءَ یک مُچانکی رنگے ءَ جوانیں گامگیجے بہ زور انت-