آپریشن بام
ٹی بی پی شونگال
نُھ جولائی ءِ شپ ءَ بلوچستان لبریشن فرنٹ ءَ “آپریشن بام” ءِ جار پرینتگ ات، چریشی ءَ پد زوت سرجمیں بلوچستان یکشلیں اُرشانی بندات کتگ- جتا جتائیں ھنداں پوجی نشانگ کنگ بیتگ انت،گچینی شھدگ بندگ کنٹرول کنگ بیتگ انت ءُ چیک تان کنگ بیتگ انت،مڈیاں لوڑیں ٹرکانی ٹائر برسٹ کنگ بیتگ انت،موبائل ٹاورزانی مشینری تباہ کنگ بیتگ انت، ھمے وڑ لیویز ءُ پولیس ءِ سلاہ پچگرگ بیتگ انت ءُ سرکاری جاہ سوتکگ انت- بی ایل ایف ءِ نیمگ ءَ “آپریشن بام” بلوچستان ءَ دراج کشیں اُرشانی اولی درچ انت، چریشی ءَ جتا جتائیں جاھاں جتا جتائیں ھشتاد ءَ گیش یکشلیں اُرش کتگ انت-
“آپریشن بام” ءَ پیش گوستگیں سال ءَ بلوچ لبریشن آرمی ءَ “ آپریشن ھیروپ ” ءِ تَک ءَ چاردہ دمگاں بازیں کساسے ءَ یکشلیں اُرش کتگ انت- اے اُرشاں پوج ءِ سلاہ پچگرگ بیتگ انت ،گچینی شھدگ بندگ بیتگ انت ءُ 48 اداراں داں دستیگی برجاہ بیتگ، موسیٰ خیل ءَ یک اُرشے ءِ وھد ءَ پاکستانی پوج ءَ بازیں کچے ءَ جانی تاوان بیتگ ات انت، ءُ مجید بریگیڈ ءِ فدائیناں لسبیلہ ءَ فرنٹیئرکور ءِ یک گچینی بنجلے دستیگ کتگ ات ءُ داں دو روچاں جنگ ترندی ءَ برجاہ داشتگ ات-
گوستگیں لھتے سالاں بلوچستان ءَ یکشلیں اُرشانی دروشم سکا گیش بیتگ انت – اسلام آباد ءَ ھستیں پاکستان ءِ انسٹیٹیوٹ فار پیس اسٹڈیز ءِ رد ءَ 2025 ءَ بلوچ سلاہ بندانی اُرشاں گوستگیں دیمپانی ءَ 70 درسد گیش بوتگ انت، ءُ اے اُرشاں بلوچستان ءِ گچینی شھدگ درستاں گیش سانمند بیتگ انت-
بی ایل ایف ءُ بی ایل اے ءِ نیمگ ءَ “ آپریشن بام ءُ “آپریشن ھیروپ” ءِ وڑیں یکشلیں اُرشاں اے گپ ءِ تچکیں منانک ھست کہ بلوچ سلاہ بند نا ایوک ءَ بلوچستان ءَ گیر درچداریں اُرش کتگ کن انت بلکیں چہ گوست ءَ گیش مھکم، یکشلیں ءُ ترندیں گامگیج ءِ ھواری ءَ پرکار بوتگ انت-
پاکستان ءِ پوجی ادارہ نا ایوک ءَ یکشلیں اُرشانی دارگ ءَ بے سوب بوتگ انت بلکیں گچینی شھدگ ءُ بازیں جاھاں سلاہ بندین گلانی ناکہ بندی ءِ ھلاپ ءَ کاروائی کنگ ءَ ھم بے سوبی ءِ دیمپانی ءَ کنگ ءَ انت – وھد ءُ ترندیں گامگیج ءِ نہ زورگ ءِ ھمے پدراھی ءَ کنت کہ بلوچستان ءَ ریاستی رٹ روچ پہ روچ نیزور بوان انت، ءُ بلوچ سلاہ بند کلاسیکی گوریلا ءِ گامگیجاں دیم ءَ جنزگ ءُ جنگِ آجوئی ترندی ءِ نیمگ ءَ رھادگ بوتگ انت – آ نی نوکیں جنگی ریپکاں گچین کنگ ءُ بلوچستان ءِ گچینی شھدگاں بازیں کلاکاں داں کنٹرول کنگ ءِ زور ءَ دار انت-