کُشگ بوتگیں مردمانی گیشتریں بھر پاکستان ءِ اُستان پنجاب ءِ میانجی ءُ زرباری پنجاب ءَ انت-
گیشیں ھالانی رد ءَ گوستگیں شپ ءَ بلوچستان ءِ دمگ لورالائی ءَ ناشناسیں سلاہ بندیں مردماں ناکہ بندی ءِ وھد ءَ پجار ءَ پد بازیں مردمے دزگیر کتگ ءُ گوں وت برتگ اَنت کہ رند ءَ آ کُشتگ ءُ چگل داتگ انت-
لورلائی پولیس انتزامیہ ءِ رد ءَ ناشناسیں سلاہ بندیں مردماں کہ پیسر ءَ ژوب ءِ نزیک ءَ ناکہ بندی کتگ ، بلوچستان ءَ چہ پنجاب ءَ روگ ءَ دو مسافر بس اوشتارینتگ انت ءُ پجار کنگ ءَ پد 9 مردم گوں وت برتگ انت ۔
پد ءَ پولیس ءَ نزیکیں دمگے ءَ آھانی لاش دست کپتگ ءُ آھاں چِست کتگ انت ءُ نادراھجاہ ءَ سر کتگ ءُ پد ءَ لاش پنجاب انتزامیہ ءِ دست ءَ دیگ بیتگ انت-
پنجاب انتزامیہ ءِ رد ءَ کُشگ بوتگیں 9 پنجاب ءِ نندوکیں مردمانی سیادی لاھور، گجرات، خانیوال، گجرانوالہ، لودھران ءُ مظفر گڑھ ءَ بوتگ۔
صابر حسین ء مھمد ریاض کامکی گجرانوالہ ، محمد آصف ء سلطان چوک قریشی ڈیرہ غازی خان، ڈیرہ ، غلام سعید ء غلام سرور خانیوال ، محمد جنید ءِ سیادی چہ لاھور ءُ محمد بلال ء عبدالوحید ءِ سیادی چہ اٹک ھمے وڑ بلاول ءِ سیادی چہ گجرات ءَ انت-
اسسٹنٹ کمشنر ژوب نوید عالم ءِ رد ءَ دُرستی 8 مسافر ءِ پجار کنگ بوتگ بلے ارش کنوکاں یک مسافر ءِ کاگد گوں وت برتگ انت۔
لورلائی ءِ نزیک ءَ کشگ بوتگیں پنجاب ءِ مردمانی دزگیر ءُ کُشگ ءِ بابت ءَ انتزامیہ ءِ نیمگ ءَ ھچ وڑیں بیان شنگ نہ بوتگ ءُ نہ کہ انگت ءَ ھچ گل ءَ اے ویل ءِ زمہ واری زرتگ۔