چہ دُکی ءَ دزکپتگیں سئیں لاشانی تہ ءَ یکے ءِ پجّار چہ پیسر ءَ بیگواھیں مردمے ءَ بیتگ

دُکی پولیس ءَ مروچی چارشمبے ءِ روچ ءَ تھانہ یاروشھر ءِ نزیک ءَ یک کورے ءَ چہ سے مردمانی لاش دزکپتگ اَنت کہ آیانی پجّار کنگ ھاتر ءَ ڈسٹرکٹ ہیڈکوارٹر ڈی ایچ کیو نادُراھجاہ دُکی ءَ برگ بیتگ اَنت-

نادُراھجاہ رِد ءَ سئیں لاشانی پجّار بیتگ اَنت کہ آیانی تہ ءَ علی محمد حسن بلوچ، محمد یونس ء محمد عیسیٰ بلوچ ءُ ولی محمد ء امیر محمد ھوار اَنت، سئینانی سیادی چہ دُکی ءِ دمگ کلی سفر علی بلوچ ءَ گوشگ بیگ ءَ اِنت-

ڈاکٹر ءَ پدر کتگ کہ سئیں مردم تیر جتگ ءُ کُشتگ اَنت-

اِھوالکار رِد ءَ محمد یونس ء محمد عیسیٰ کہ آئی ءِ لاش مرچی دزکپتگ، پیسر ءَ پاکستانی پوج ءِ دست ءَ زورانسری آوار جنی ءِ نشانگ کنگ بیتگ ، بلوچستان نیشنل پارٹی مینگل ءَ بیست یک جون ءَ شنگ کتگیں یک درشانے ءِ تہ ءَ راست ھم کتگ اَت-

بی این پی مینگل ءِ رِد ءَ چہ دُکی ءَ سیادی داروکیں یک ٹولی ءَ شال ءَ پارٹی سروک ءَ گوں گند ءُ نند ءَ گوشتگ کہ کلی سفر علی بلوچ ءَ پاکستانی پوج ءَ بیڑ وھد ءَ بازیں مردمے آوار جتگ ءُ بیگواہ کتگ اَت کہ آیانی تہ ءَ غلام شاہ ء نیک محمد، منظور احمد ء محمد اسلم، محمد یونس ء محمد عیسیٰ، فرید احمد ء محمد انور، محمد انور ء محمد حسین، بشیر احمد ء رحیم بخش ءُ نصیب اللہ ء رحیم بخش ھوار بیتگ اَنت-

مروچی دزکپتگیں لاشانی تہ ءَ محمد یونس ء محمد عیسیٰ لاش ھوار اِنت-

زانگ بہ بیت کہ اے ماھانی تہ ءَ چہ دُکی ءَ پاکستانی پوج ءُ کاؤنٹر ٹیررازم ڈیپارنمنٹ ” سی ٹی ڈی ” ءِ نیمگ ءَ چہ جتاجتائیں آپریشنز ءَ گمانی سلاہ بندیں مردمانی جنگ ءِ ٹاہ داتگ بلے اشی ءَ پد آیانی تہ ءَ بازیں مردمے ءِ پجّار بیگواھیں مردماں چہ بیتگ اَنت-

اشی ءَ ساری بیست ھشت جون ءَ سی ٹی ڈی ءَ چار شکی ئیں سلاہ بندیں مردمانی جنگ ٹاہ داتگ اَت کہ آیانی پجّار دمگی شائر وزیر خان سھالانی ء ریحان (کہ ھشت ماہ ءَ چہ بیگواہ بیتگ)، صوبت ء خمیس (2 ماہ ءَ چہ بیگواہ بیتگ) ءُ حیدر علی ء وزیر احمد( 11 ماہ ءَ چہ بیگواہ) نام ءَ چہ بیتگ اَنت-

ٰآیانی نزیکیں سیادی ءُ دمگی اِھوالکار ءَ راست کتگ کہ آ پاکستانی پوج ءَ آوار جتگ ءُ بیگواہ کتگ اَت-

اشی ساری اپریل ءَ ھم دُکی ءَ یک گمانی میڑے ءِ میان ءَ پنچ مردم جنگ ءِ ٹاہ داتگ اَت آیانی تہ ءَ سے ءِ پجّار محمد دین مری جھمنند ھرنائی، اعجاز ء خدابخش جھمنند منگچر، ءُ عبدالنبی مری نام ءَ چہ بیتگ اَنت وھدے کہ دو لاشانی پجّار انگت نہ بیتگ اَنت-

مروچی دزکپتگیں دگہ دوئیں لاشانی پجّار ھم بیتگ اَنت، بلے آیانی درگت ءَ گیشیں ھالانی آیگ پش کپتگ-