بلوچ یکجھتی کمیٹی چہ تربت ءَ سیادی داروکیں نامداریں ءُ چاگردی باسک ءُ سول سوسائٹی کیچ ءِ کنوینر گلزار دوست ءِ گوستگیں شپ ءَ لوگ ءِ سر ءَ بیڑ ءِ وسیلہ ءَ سی ٹی ڈی ءِ دستاں زورانسری بیگواھی ءِ دزگیری ءِ ھلاپ ءَ مزھمت کنیں۔ مرچی آئی ءَ را آمیدگس ءَ پیش کنگ بوتگ اود ءَ آئی ءِ سر ءَ باز دروگیں ءُ سیاسی بنیادانی سر ءَ دروگیں کیس جَتگ، کہ یک تچکیں کلوھے کہ ھرچی بلوچستان ءَ انساپ، انسانی ھکّاجی ءُ زورانسری بیگواھیانی ھلاپ ءَ آواز چست کنگ بیت، آ ریاستی نشانگ ءِ بیر جوڑ بیت۔
بی وائی سی ءَ گْوشتگ کہ گلزار دوست یک پرامن ءُ راجی توارے کہ چہ دراجیں مدتے ءَ گار بوھوکیں کھولاں، ماورائے عدالت کوش ءِ بے کسانی، ءُ ریاستی زورانسری ءِ ھلاپ ءَ آواز چست کُتگ۔ آئی ءِ جھد ھاس کر آئینی، سیاسی، ءُ انسانی ھکّانی راہ بوتگ۔ آئی جرم بس ھمیش اِنت کہ آ ھاموش تماشاھی بوگ ءَ ابید بے کسانی ھمراہ بوتگ۔ ءُ ھمے گپ ریاستی ادارھاں اوپار نہ بوگ ءَ انت۔
دیمتر ءَ گْوشگ بیتگ کہ بلوچستان ءَ سی ٹی ڈی ءِ کرد نہ ایوک ءَ جنجالی اِنت بلکیں بدنام ھم ھست اِنت۔ اے ادارہ نوں یک انچیں سلاھے جوڑ بوتگ کہ ایوک ءَ راستی ءُ مزاحمت ءِ سیاست کنوکیں مردمانی ھلاپ ءَ کارمرد کنگ بوگ ءَ اِنت۔ بے ھچ وڑیں کانونی توجیل ءَ لوگانی سر ءَ اُرش کنگ، مردمانی بیگواہ کنگ ءُ دروگیں کیس جوڑ کنگ ءَ آھانی جھد چوناھا بلوچ راج ءِ بے توار کنگ ءِ یک برجاھیں سلسلہ یے۔
آئی ءَ گْوشتگ بلوچ یکجھتی کمیٹی گلزار دوست ءِ زوت ءُ بے شرتیں یلہ کنگ ءِ لوٹ ءَ کنت ءُ اے گپ ءَ پدّر کنت کہ بلوچ راج ءِ توار زوراکی، بیھار ءُ مقدمہ ءِ وسیلہ ءَ سرکپ کنگ نہ بیت۔ اگاں ریاست ءِ ھیال اِنت کہ سیاسی جھدکاراں نشانگ جوڑ کنان ءَ بلوچستان ءَ ھاموشی ایر کنگ بیت گُڑا اے آئی ءِ مستریں نادلگوشی اِنت۔ ما گوں گلزار دوست ءَ ھر پڑ ءَ اوشتاتگیں، ءُ آئی ءِ یلہ کنگ ءَ داں وتی توار ءَ چست کنیں۔