آل پنجگور حسام حامد میموریل فٹبال ٹورنامنٹ ءِ گڈی میچ 6جولائی یک شمبے ءِ روچ ءَ گرمکان اسپورٹس گراؤنڈ ءَ نوک اسٹار کلب ٹی ایس پی ءُ بلوچ موسی جان کلب خدا آبادان ءِ میان ءَ لیب کنگ بوتگ ۔
وھدے کہ ھزاراں تماشائی یک دلکشیں میچے ءِ اُمیت ءَ اسٹیڈیمے ءَ سر بوتگ انت، میدان ءَ یک انچیں ندارگے پیش اتکگ کہ آئی ءَ فٹبال ءَ را ایوک ءَ یک گوازی یے ءَ چہ گیش برز کت ءُ انسانی جزبگ ءِ چیدگ جوڑینتگ-
گڈی میچ ءِ بندات بیگاہ 4:45 ءَ گوں ترندیں لَھڑ ءُ جزباتی دروشم ءَ بوتگ۔ دوئیں ٹیم ٹاک بوتگیں وھد ءَ میدان ءَ سر بوتگ اَنت۔ میچ ءَ چہ پیش بلوچ موسیٰ جان کلب ءِ ورنائیں گول کیپر زیشان ءِ واستا داوا وانگ بوت، ایشی ءَ پد اسٹیڈیم ءَ یک منٹے ءِ ھاموشی دارگ بوتگ۔
دوئیں ٹیم گمیگ ات انت ھاسیں رنگ ءَ بلوچ موسیٰ جان کلب ءَ کہ سکیں پدردی ءِ جاور ءَ ھم فائنل ءَ گوازی کنگ ءِ پیسلہ کتگ ات۔ بلے گوازی ءِ بندات ءَ چہ بس 15 منٹ ءَ پد موسیٰ جان کلب ءِ کپتان سلال حسن ءَ میدان ءِ سرجمیں کش ءُ گوراں وتی دست چست کنان ءَ میچ ءَ چہ درکپگ ءِ جار جت۔
آئی ءَ گوشت کہ منی ٹیم جسمانی رنگ ءَ میدان ءَ اِنت بلے زھنی ءُُ جذباتی رنگ ءَ ایشانی دیم ءَ گوازی کنگ ممکن نہ اِنت۔
ھمے کہ بلوچ موسیٰ جان کلب ءَ میچ ءِ برجاہ دارگ ءَ چہ انکار کت گڑا نوک اسٹار کلب ٹی ایس پی ءِ کپتان ءُ کوچ آصف فتح ءَ ھوار درستیں لیب کنوکاں وتی کھلاڑیانی نیمگ ءَ رھادگ بوت ءُ آھانی سماہ ءِ سرپد بوگ ءَ میچ ھما جاہ ءَ آسر کت۔ نوک اسٹار کلب ءَ پد ءَ یک اچانگی پیسلھے کت۔ گڈی ٹرافی بلوچ موسی جان کلب ءِ نام ءَ دیگ بوتگ-
زانگ بہ بیت کہ اے فائنل یک ناوشیں وھدے ءِ ساھگ ءَ گوازینگ بوگ ءَ ات۔ بلوچ موسی جان کلب ءِ ورنائیں گول کیپر زیشان کہ آئی ءَ سیمی فائنل ءَ جوانیں کرد پیش داشتگ ات میچ ءَ پد وتی گس ءَ روگ ءِ وھد ءَ ناشناسیں مردماں آوار جتگ ات۔ دومی روچ ءِ سُگب ءَ آئی ءِ لاش شھر ءِ دمگ ءَ دزکپتگ ات۔