گوستگیں روچ ءَ ھب پولیس ءَ بی وائی سی ءِ ریلی ءِ سر ءَ کریک ڈاؤن کنگ ءَ پد تیر گواری کُتگ بازیں کچے ءَ زھرشان کنوک دزگھگیر کُتگ اَنت۔
بلوچ یکجھتی کمیٹی لسبیلہ ریجن ءِ رِد ءَ 5 جولائی ءَ ھب چوکی ءَ یک پُرایمنیں زھرشانی ریلی یے کُشگ بوتگ اَت کہ ریلی برجا بوگ ءَ پیسر چہ ھب پولیس ءِ نیمگ ءَ ھراب کنائینگ بوتگ، زھرشان کنوک یک یک بوتگ انت کہ ھمے میان ءَ پولیس ءَ اناگہ مُچی ءِ سر ءَ تیر شان ءُ ارس گیس ءِ کارمرز کُتگ ءُ پنچ پُرایمنیں زھرشان کنوک در کانونی رِد ءَ دزگیر کُتگ اَنت۔
گل ءِ رِد ءَ دزگیریں مردمانی تہ چار زالبول ھم ھوار اَنت چمیشی ءَ چِہ یک باسکے ءُ زورانسریں بیگواھانی کھول ھوار انت کہ وتی گار بوتگیں مردمانی ھاتر ءَ آواز چِشت کنگ ءَ بوتگ اَنت۔
بی وائی سی ءِ گُشگ انت کہ پولیس ءَ ھمے میان ءَ ھیومن رائٹس کمیشن آپ پاکستان ءِ کورآرڈینیٹر ابدللہ بلوچ ھم دزگیر کُتگ، چہ دزگیری ءَ بیست کلاک ءَ چہ گیش گوستگ بلے انوگ ءَ تک پولیس ءَ دزگیر کنگ ءَ چُشیں ھچ چیز کانونی جواز پیش نہ کُتگ۔
گل ءِ رِد ءَ وھدے آیانی وکیل تھانہ ءَ شُتگ اَنت گڑا آیاناں گُشگ بوتگ کہ آ واتر برو اَنت چیاکہ درستیں بندیگ اَبید چُشیں کانونی کاروائی ءَ گڈانی جیل ءَ دیم دیگ بوتگ اَنت۔
زانگ بہ بیت گوستگیں روچ پولیس ءَ ذیشان ظھیر ءِ کوش ءِ ھلاپ ءَ ھب چوکی ءَ کشگ بوتگیں ریلی ءِ سیرت چوک ءِ نزیک ءَ داشتگ اَنت ءُ بی وائی سی ءِ رھشونانی دزگیر کنگ ءِ جُھد کُتگ چمیشی ءِ سبب ءَ چہ پولیس ءِ نیمگ ءَ تیرگواری ءِ جاور آتکگ۔
چہ بی وائی سی ءِ نیمگ ءَ پَنجگُور ءَ گل ءِ دمگی باسک ءُ چہ دہ سالاں زورانسری بیگواھیں ظھیر بلوچ ورنائیں بچ ذیشان ظھیر ءِ کوش ءِ ھلاپ ءَ بلوچستان ءِ سرجمیں شھراں زھرشانی برجا انت، انچُش کہ جتائیں دمگاں زھرشان کنوکانی سر ءَ پولیس ءِ کریک ڈاؤن ءِ آماچ اَنت
چہ ایشی ءَ پیش کراچی ءَ ھم بی وائی سی ءِ ریلی ءِ سر ءَ سندھ پولیس ءَ اُرش کُرتگ زالبول رھشوناں اَبید چار زھرشان کنوک ھم دزگیر کُتگ انت بلے رند ءَ یل کنگ بوتگ اَنت۔
بی وائی سی ءَ انسانی ھکّانی ادارھاں چہ لوٹ کُرتگ کہ آ بلوچستان ءَ برجائیں ریاستی زُلم ءُ زوراکی ءَ نوٹس بزور اِیت ءُ پُرایمنیں سیاسی باسکانی ھک ءِ زھرشانی ءِ ھمراھداری ءَ بکن انت۔