بلوچستان ءَ گْوستگیں بشی ھوراں جتاجتائیں وئیلانی تہ ءَ کم چہ کم 6 مردم بیران ءُ 7 ٹپیگ بیتگ اَنت ۔
اُستانی ڈیزاسٹر مینجمنٹ اتھارٹی ءِ رپورٹ ءِ رد ءَ 28 جون 2025 ءَ چہ برجاھیں ھور ءِ وھد ءَ ژوب، زیارت، کوھلو، ءُ موسی خیل ءِ دمگانء تہ ءَ آپ ءِ بڈگ ءُ گروگ ءِ وئیل بوتگ اَنت کہ ایشی ءِ آسر ءَ جانی تاوان ءُ جاگھاں ءِ تاوان بوتگ۔
رپورٹ ءِ رد ءَ بشی ءِ ھور ءِ آسر ءَ 16 لوگ کپتگ کہ ایشانی تہ ءَ گیشتریں لوگ ھزدار ءُ زیارت ءَ بوتگ اَنت۔ محکمہ وانگی ءِ یک وانگجاھے ھم ھور ءَ سانمند بوتگ۔
زانگ بہ بیت کہ بلوچستان ءَ گوستگیں سال 2024 ءِ وھد ءَ سک باز تاوان رس اتگ ایوک ءَ اگست 2024 ءَ ھور ءِ سبب ءَ 11 مردم بیران ءُ 8 ٹپی بوتگ انت ءُ بازیں کچے ءَ لوگاں تاوان رس اتگ۔
گوستگیں سال ءِ پی ڈی ایم اے ءِ موسمیاتی رپورٹ ءِ رد ءَ اے وھد ءِ تہ ءَ 62 ایکڑ کشت ءُُ کشاری زمین، 12کلومیٹر سڑک ءُ دگہ بنکی سنچ ءَ ھم تاوان بوتگ۔
محکمہ موسمیات ءَ آیوکیں روچاں گیشیں ھور ءِ پیشکامی کتگ کہ ایشی ءِ رد ءَ پی ڈی ایم اے ءُ بنجاھی انتزامیہ ءَ را زوتیں گامگیج زورگ ءِ زلورت انت۔ لھتے دمگ ءَ راہ بند کنگ ءُ بجلی ءِ بند بوھگ ءِ ھال ھم ھست انت۔
پی ڈی ایم اے ءُ ھمگرنچیں ادارھاں شھریاں گوں دزبندی کتگ کہ آ آپی راہ، دریا ءُ جھلیں دمگاں چہ دور بہ بنت، موسمی جاور ھال ءِ بابت ءَ سرپد بہ بنت ءُ موسمیات ءِ محکمہ ءِ جارانکانی سر ءَ امل بہ کن انت ءُ زوتیں جاور ءِ وھد ءَ زوتیں وھد ءَ دمگی واکداراں گوں رھوت بہ کن انت۔
چاگردی زانتکارانی رِد ءَ موسمی بدلی ءِ سبب ءَ بلوچستان ءَ ھور ءِ ترندی ءُ بے موسمی گیش بوھگ ءَ اِنت کہ ایشی ءَ چہ نہ ایوک ءَ انسانی جان ھترہ ءِ آماچ بنت بلکیں کشت ءُ کشار ءُ زرکاری ءِ سر ءَ ھم سکیں سان کپ اَنت۔
آئی ءَ گوشت کہ 2025 ءِ زوتیں ھورانی سبب ءَ جانی ءُ مال ءِ تاوان اگاں چہ 2024 ءِ تاوان ءَ کم اِنت بلے اے ستک اِنت۔ ھکومت زوت آماچیں دمگاں کمکی کارانی بندات ءَ بہ کنت ءُ آیوکیں وھد ءَ اے وڑیں کھراں گوں گر ءُ چیل بوھگ ءِ واستا جوانیں گامگیج زیرگ بہ بیت۔