گوستگیں شپ ءَ پولیس ءَ کیچ ءِ بنجاھی شھر تربت ءَ عبدو ءِ سیمسر ءِ بند کنگ ءِ ھلاپ ءَ برجاھیں نندانک ءِ سر ءَ اُرش کتگ ءُ زھرشانی کنوکاں بے دردی ءَ جتگ ءُ کم چہ کم 14 مردم دزگیر کتگ انت۔
اے ویل ءِ ھلاپ ءَ مروچی شھر سرجم ءَ ھرتال انت ءُ واپاری بنجل بند انت، بندش ءِ سبب ءَ مرچی شھر ءَ ٹریفک بند بوتگ ءُ مزنیں کساسے ءَ شھریاں دگاں مارچ کتگ۔
اے درگت ءَ زالبولانی مزنیں کساسے ءَ ھم زھرشانی روانک ءَ بھر زرتگ۔
زھرشانی کنوکاں لوٹ کتگ کہ دزگیریں مردم زوت یل کنگ بہ بنت ءُ عبدوئی ءِ سیمسر پچ کنگ بہ بیت دانکہ ھزاراں روزگار ءِ گوں سیادی داروکیں مردمانی گرانیں جاور ھلاس بہ بنت۔
زھرشانی کنوکیں شھریاں گشتگ کہ سیمسر ءِ سوداگری ءِ بند کنگ ءَ چہ وردن ءُ وراک ءُ بنیاتی لوٹانی کمی بوتگ ءُ سیمسر ءَ کار کنوکیں مردم چہ زرداری ءَ سکا باز تاوان رسگ ءَ انت۔
یات بہ بیت ابدوئی ءِ سیمسر ءِ بند کنگ ءِ ھلاپ ءَ شھری بازیں روچاں تربت ڈی بلوچ چوک ءَ زھرشانی کنگ ءَ اَنت۔ زھرشانی کنوکیں مردمانی گْوشگ اِنت کہ اگاں دزگیریں مردم یل کنگ نہ بوت ءُ سیمسر پچ کنگ نہ بوت گڑا زھرشانی ءِ پھنات گیش کنگ بنت اِنت۔
دومی نیمگ ءَ ڈپٹی کمشنر کیچ ءَ پریس کانفرنس ءِ تہ ءَ جار جتگ کہ ابدوئی ءِ سیمسر باندا ءَ چہ سرجمی ءَ پچ کنگ بیت ءُ شھری ھمک روچ ءِ وڑ ءَ سیمسر ءَ چہ گوزگ ءِ موہ ءَ دار اَنت ۔