مجگی گلامی پہ زالم ءَ موھے
نبشتہ کار :شَکّل بلوچ
دی بلوچستان پوسٹ
مجگی گلامی ءِ بازیں چیدگ ءُ نشان بنت ءُ پہ ھمے چیدگانی پُشدر ءَ زالم وتی زُلم ءُ زوراکیاں گیش کنت۔ ما بہ زان اِیں کہ آ کجام مجگی گلامی ءِ چیدگ اَنت کہ زالم گوں مزلوم ءَ وتی پادانی چیر ءَ لگتمال کنت۔
مجگی گلامی ءِ اولی نشان ءُ نادراھی بے زانگی اِنت، بے پوھی اِنت وھدے یک گلامے اے سرپد مہ بیت کہ ملک چی یے، راج ءُ زمینی راجدپتر چی یے، راج ءِ راجی زبان، دود ءُ دودمان چی انت آ نہ زانت گڑا زوت گوں وتی بے وسی ءَ دری زوراوریں زالم ءِ دست ءَ رَد کپ اِیت ءُ آئی ءِ رد دیگ ءَ پد گوں آئی ءَ ءُ آئی ءِ مال ءُ زمین ءِ سر ءَ پہ زور کبزہ کنگ ءَ وتی جوڑ کُتگیں، وتگڑیں کانود ءِ پُشدر ءَ، اَنچُش کہ پہ سِٹلمنٹ ءِ نام ءِ سر ءَ گلام ءِ زمین ءَ وتی نام ءَ کنت ءُ آئی ءَ چہ وتی جند ءِ زمین ءَ بے وارس کَنت ءُ گَلّین اِیت۔ اے مجگی گلامی ءِ اولی نشان ءُ چیدگ اِنت کہ زالم بے وسیں گلام ءِ مال ءُ مڈیانی لُٹ ءُ پل ءَ چہ پد گلام اِش جوڑ کنت۔ بلوچستان ءَ پاکستانی نزام ءِ تہ ءَ داشتگیں گلامانی پُشدر ءَ اَنچُش کہ نشنل پارٹی ءِ لھتے وتگڑیں وزیر ءُ گزیرانی دارگ ءَ بلوچ لس مھلوکانی زمین کبزہ کُتگ ءُ وتی ءُ وتی آیوکیں پدریچانی واستا کبزہ کتگ ءُ نشتگ اَنت پد ءَ ھمے وزیر ءُ گزیر کاینت بزگیں بلوچاں پنڈگ ءَ سولر، آرت، ءُ راشن بھر کن اَنت۔ دومی نیمگ ءَ بے نزیر اِنکم سپورٹ ءِ نام ءَ پہ پنڈگ زر بھر کن اَنت۔ بلوچستان ءِ جتا جتائیں دمگاں زالمیں اِستان ءِ پاکستان وتی داشتگیں سردارانی پُشدر ءَ مھلوکانی گشتریں زمین کبزہ کنائینتگ ءُ وتی نام ءَ کُتگ اَنت۔ اے یک رد ءُ بند ءِ وسیلہ ءَ بلوچ ڈیھ ءِ مال ءُ مڈیانی سر ءَ کبزہ کنگ ءُ پد ءَ بلوچ راج ءِ چُکچینی ءَ ھمے سردارانی وسیلہ ءَ کنائینگ ءَ انت۔ ھمے بے زانتی ءِ سبب ءَ گلام چہ استان ءِ وتگڑیں آمیدگس ءَ وتی ھک ءُ انساپ گپت نہ کن اَنت چمیشکا استان ءِ وتگڑیں آمیدگس ءِ وسیلہ ءَ زالم کانودی پُشدر ءَ گلام ھک ءُ انساپ ءِ ھلاپ ءَ کارمرز کنت۔
مجگی گلامی ءِ دومی چیدگ ھمے بے زانتی ءِ وسیلہ ءَ گلام ءِ تہ ءَ پدمنتگی ودّ اِیت ءُ پدمنتگی ءِ ودّگ ءَ پد گلام جھالت ءِ آماچ بیت ءُ ھمے جھالت ءِ پُشدر ءَ زالم ءُ کبزہ گیر گلام ءِ جھالت ءِ موہ ءِ پُشدر ءَ گیش چہ آئی ءَ پائدگ زُور اِیت، آئی ءَ گیش جسمانی گلامی ءِ نیمگ ءَ ودین اِیت، آئی ءَ را ناجائزیں کار گپت ءُ گلام جوڑ کنت۔
مجگی گلامی ءِ سیمی چیدگ گلام ءِ تہ ءَ نیزگاری ءِ ودینگ ءَ پد آئی ءَ تہ ءَ لب ءُ لالچ ودی کنت چہ ھمے لبّ ءُ لالچانی پُشدر ءَ گلام ءَ بھر ءُ بانگ کنت داں کہ کبزہ گیر وتی کبزہ ءُ لُٹ ءُ پل ءَ برجا داشت بکنت۔مجگی گلامی ءُ بازیں پندل سازگ بنت چہ استانی زوراور ءِ دست ءَ بلے وھدے کہ گلامیں راج کہ تپاکی ءِ نیمگ ءَ وتی سر ءَ کہ کشّ اِیت گڑا آ گلامیں راج ءِ چُکچینی ءُ کُشت ءُ ھون ءَ بنا کنت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-