بلوچستان ءِ دمگ مستونگ ءَ ناشناسیں سلاہ بندیں مردماں تھسیل کارگس ءِ سر ءَ اُرش کتگ ۔ اُرش کنوکاں بازیں گاڑی سوتکگ انت ءُ دمگ ءَ بازیں وھدے ءَ تیرگواری ءُ تراکانی توار اشکنگ بوتگ انت۔
دمگی مردمانی رد ءَ اے اُرش ءِ وھد ءَ تاں انوگ ءَ کم چہ کم سئے مردم ٹپیگ بوتگ اَنت ءُ آ زوت ھیڈ کوارٹر نادراھجاہ ءَ سر کنگ بوتگ اَنت۔ دمگی انتزامیہ ءَ ھسپتالانی تہ ءَ ایمرجنسی ءِ جار جتگ ءُ اژدری ڈاکٹر تلب کتگ انت۔
چمدیستگیں مردمانی رد ءَ اُرش کنوک نوکیں سلاھاں گوں سلاہ بند بوتگ اَنت۔ آھاں سرکاری کمپاؤنڈ ءِ تہ ءَ گاڑی سوتکگ انت ءُ اود ءَ ھستیں سیکورٹی کارندھانی سر ءَ تیر گواری کتگ۔ پد ءَ دمگ ءَ مزنیں تراکانی توار ھم بوتگ انت۔
اُرش ءَ پد مستونگ شھر ءِ بنجاھی بازار ءُ کش ءُ گور ءِ دکانداراں وتی دکان بند کتگ اَنت۔
انگت ءَ کس ءَ اے اُرش ءِ زمہ واری نہ زرتگ۔ بلوچستان ءَ گوستگیں وھداں چشیں ویلانی تہ ءَ گیشی گندگ بوتگ۔