کراچی ءُ بلوچستان ءِ جتاجتائیں دمگاں دوازدہ مردم بیگواہ ءُ دو یل کنگ بیتگ اَنت

کراچی ءُ بلوچستان ءِ جتاجتائیں دمگ گوادر بارکھان، مستونگ ، بولان ءُ کراچی ءَ دوازدہ مردم آوار جنگ بیتگ اَنت وھدے کہ دو یل کنگ بیتگ اَنت-

گیشیں ھالانی رِد ءَ گوستگیں شپ ءِ کساس ساھت یک ءَ بارکھان ءِ دمگ رکھنی ءَ برجاہ نیشنل پارٹی ءِ پُرکاریں رھشون ءُ یونین کونسل کچ بغاو ءِ گچینیں وائس چیئرمین، میاں خان گڈیانی ءِ لوگ ءِ سر ءَ کاؤنٹر ٹیررازم ڈیپارنمنٹ ( سی ٹی ڈی ) بید آمیدگسی وارنٹ ءَ بیڑبرتگ میاں خان گڈیانی چست کتگ وتی ھمراھی ءَ برتگ-

بیڑ وھد ءَ آئی ءِ چُک سلال خان ءُ برازتک ستار خان ھم آوار جتگ ناشناسیں جاھے ءَ برتگ-

کھول رِد ءَ وئیل ءَ پد ناں چُشیں کانودی کاگدے پیش داشتگ، نانکہ دزگیری سبب گوشتگ – سی ٹی ڈی ءِ اے کاروائی ناں تھنا آئینی ھکانی پادمالی اِنت بلکیں یک گچین کتگیں راجی نمائندگ ءِ ازت ءِ نپس ھم لگتمال کتگ-

دومی نیمگ ءَ شپ ءِ وھد ءَ چہ رکنی شھر ءَ یک ورنایے ھم آوار جتگ کہ آئی ءِ پجّار گل میر نام ءَ چہ بیتگ-

ھمے وڑ تیاب دپی شھر گوادر ءِ دمگ چہ جیونی ءَ ھال اِنت کہ پاکستانی پوج ءَ محمد ء رحمت ءُ ابراھیم ء حنیف آوار جتگ ءُ بیگواہ کتگ-

دومی نیمگ ءَ مستونگ ءَ گوستگیں شپ ءِ 12:30 ءَ چہ کلی قمبرانی ءَ سے مردم ھمراھی ءَ زورانسری آوار جتگ اَنت-

بیگواہ کنگ بیتگیں مردمانی تہ ءَ پزل الرحمٰن قمبرانی، ضیاء الرحمٰن قمبرانی ءُ شھرباز بنلگزئی ھوار اَنت-

زانگ بہ بیت کہ فضل الرحمٰن ءُ ضیاء الرحمٰن اشی ءَ ساری مارچ 2025 ءَ ھم بیگواہ کنگ بیتگ اَنت کہ یک ماھے ءَ پد اپریل ءَ یل کنگ بیتگ اَنت-

ھمے وڑ بولان ءَ پاکستانی پوج ءَ ورنا گُل میر آئی ءِ لوگ سر ءَ بیڑبرتگ آوار جنگ ءَ پد بیگواہ کتگ-

کراچی ءِ نامی ئیں باپاری دمگ صدر ءَ برجاہ چہ عمّا ٹاور چارشمبے سی جولائی ءِ بیگاہ ءَ سادھیں پوشاکانی تہ ءِ ءُ دیم پوش ءُ سلاہ بندیں مردماں نامی ئیں باپاری ورنا کاشف یعقوب آوار جتگ-

وئیل ءِ بیگاہ ءِ شش ءَ بیتگ وھدے کاشف وتی موباھل دکان ءَ ساڑی بیتگ- چمّگدانی رِد ءَ بازیں سلاہ بندیں مردم دکان ءِ تہ ءَ پُترتگ اَنت، کاشف گِران کتگ ڈن ءَ در کتگ ءُ ناشناسیں جاھے ءَ برتگ-

کاشف یعقوب ءِ سیادی چہ لیاری ءَ اِنت ءُ آئی ءِ کھول آئی ءِ سلامتی درگت ءَ سک تُرس ءِ تہ ءَ اَنت-

دومی نیمگ ءَ بیست سے جون 2025 ءَ بلوچستان ءِ دمگ بولان ءَ میاں کور ءِ ھند ءَ پوجی لشکر کشی ءِ میان ءَ دو مردم جلال ء اللہ داد مری ءُ یک ناشناسیں مردمے ءِ آوار جنگ ءَ پد بیگواہ کتگ- اِھوالکار رِد ءَ دوئیں مروچی سی یک جولائی ءَ چہ لورالائی ءَ آجو بیتگ اَنت-