بلوچستان ءَ دروگیں دیم پہ دیمی میڑاں زورانسری بیگواہ بوتگیں مردمانی کُشگ ءِ نام ءَ نامداریں کاؤنٹر ٹیررازم ڈیپارٹمنٹ ( سی ٹی ڈی) ءَ تربت آپسر ءِ نندوکیں ھشت سالی ئیں زھگ ءِ ھلاپ ءَ ایف آئی آر نبشتگ کتگ۔ زھگ ءِ سر ءَ گلزار دوست ءِ سوشل میڈیا پلیٹ فارم ٹک ٹاک ءَ گشتانک ءِ شنگ کنگ ءِ بھتام انت ۔
چہ ویل ءَ پد انسانی ھکانی گل، سیاسی ءُ چاگردی دمگاں ترندیں لیکہ دیم ءَ اتکگ انت۔ آھانی گشگ انت کہ یک کسان سالیں زھگے ءِ ھلاپ ءَ ناشرکاری ءِ وڑیں چوشیں ادارھے ءِ نیمگ ءَ کانونی کاروائی نا ایوک ءَ گیر مناسب انت بلکیں انسانی ھکانی لگتمالی انت-
دمگی مردمانی رد ءَ ایف آئی آر ھما وھد ءَ درج کنگ بوتگ کہ سھیب ءِ وانگجاہ ءِ چھٹی ھلاس بوھگ ءَ پد دومی روچ ءَ کلاس بندات بوھگ ءَ بیتگ انت۔ مات ءُ پت ءُ دمگی مردمانی گْوشگ اِنت کہ اے گامگیج ءَ نہ ایوک ءَ زھگ ءِ وانگ ءُ زانگ ءِ کارانی سر ءَ تاوان رس اتگ بلکیں نپسیاتی تاوان ھم داتگ۔
اے بابت ءَ انگت ءَ واکدارانی نیمگ ءَ سرکاری لیکہ دیم ءَ نیتکگ انت۔ انسانی ھکانی جھدکاراں لوٹ کتگ کہ اے زھگ ءِ ھلاپ ءَ کیس زوت واتر کنگ بہ بیت ءُ ھما کاراں چہ رکّینگ بہ بیت کہ زھگانی آیوکیں وھد ءَ ناگیگی ءِ دیمپان کت انت۔
زانگ بہ بیت یکشل ءَ بلوچ راجدوستیں گلاں ھوار دمگی انسانی ھکانی گلاں سی ٹی ڈی ءِ کاروائی شکی لیک اِتگ اَنت۔ ھمے زوتاں بلوچستان ءِ مستریں سلاہ بندیں گل بلوچ لبریشن آرمی ءَ سی ٹی ڈی ءَ بلوچ ءِ دژمنیں لشکر نامینتگ ءُ آئی ءِ ھلاپ ءَ تچک ءَ اُرش ءِ جار جتگ۔